Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/11649
Samfélög manna hafa í gegnum aldirnar heiðrað minningu látinna á ýmsan hátt og mismunandi hefðir hafa skapast í því samhengi í aldanna rás. Segja má að kirkjugarðar séu nokkurs konar listasöfn undir berum himni og í legsteini sameinist list og saga.
Frá 18. og öndverðri 19. öld hafa, í flestum kirkjugörðum á Íslandi, varðveist innlendir legsteinar. Margir þeirra 19. aldar steina, aðallega í kirkjugörðum vestanlands, eru sérstakir vegna þess að þá má alla rekja til þeirra Húsafellsfeðga Jakobs Snorrasonar og sona hans Gísla á Augastöðum og Þorsteins á Húsafelli, sem voru þekktir hagleiksmenn og steinsmiðir. Markmið ritgerðarinnar er að draga saman á einn stað upplýsingar um legsteina þeirra Húsafellsfeðga og skoða einkenni þeirra; form, skraut og leturgerð. Í fyrri hluta ritgerðarinnar verður saga legsteina og minningarmarka á Íslandi reifuð sem og einnig saga steinsmíði á Íslandi. Þá verður vikið að þeim Húsafellsfeðgum og saga þeirra tengd íslenskri alþýðulist, því þeir legsteinar sem hér eru til umfjöllunar eru dæmi um slíka list. Í seinni hluta ritgerðarinnar eru legsteinarnir sjálfir í brennidepli. Þar kemur fram staðsetning þeirra og einkenni, auk nákvæmra lýsinga á gerð og grafskrift 28 þessara steina sem ekki hafa verið rannsakaðir áður.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
BA-ritgerð PDF.pdf | 2.34 MB | Opinn | Heildartexti | Skoða/Opna |