Aldraðir innflytjendur. Sýn til framtíðar

Abstract

Viðfangsefni ritgerðarinnar er að varpa ljósi á félagslegar aðstæður aldraðra íbúa af erlendum uppruna á Íslandi og veruleikann sem þeir og samfélagið standa frammi fyrir. Norrænar rannsóknir benda til þess að aldraðir innflytjendur búi við bágari efnahagskjör og verra andlegt og líkamlegt heilbrigði en hinir innfæddu. Þeir kljást við skort á upplýsingum og nýta sér velferðarþjónustu síður en innfæddir. Greint er frá stefnu íslenskra stjórnvalda öldrunar- og innflytjendamálum eins og hún birtist í lögum, alþjóðasamningum og yfirlýsingum. Farið er yfir þær lýðfræðilegu breytingar sem orðið hafa á samsetningu þjóðarinnar síðasta áratuginn en fjöldi innflytjenda er nú um 8% af þjóðinni. Í hópi 65 ára og eldri eru innflytjendur um 2,6%. Miðað við aldursdreifingu þeirra innflytjenda sem nú búa hér á landi má gera ráð fyrir að hlutfall innflytjenda í aldurshópnum verði mun meira í framtíðinni. Þetta bendir til þess að íslenskt velferðarsamfélag standi frammi fyrir nýjum áskorunum með fjölbreyttari bakgrunni notenda í velferðar- og öldrunarþjónustu sem þörf er að mæta.