Lestur og leikur : námsspil byggt á lestrarkenningu Ehri

Abstract

Lagt var upp með að skoða lestrarkenningu Ehri, skoða þau stig sem að börn fara í gegnum á leið sinni til læsis og útbúa námsspil sem fellur að kenningum hennar. Kenning Ehri skiptir áföngum í lestri í fjögur stig og í ritgerðinni er meginárhersla lögð á tvö stig, þ.e. bókstafastig að hluta og fullkomið bókstafastig en markhópur námsspilsins er líklega staddur í öðru hvoru stiginu. Farið er yfir umskráningu og sjónrænan orðaforða sem eru bæði mikilvæg hugtök lestrarkennslu yngstu bekkja. Nám og leikur eru tvinnuð saman og skoðað hvort og þá hvernig þessi heiti eiga saman í aðalnámskrá, þ.e. hvort að fjallað sé um þá leið að nýta námsspil í kennslu og þá á hvaða hátt. Að lokum er sett fram greinargerð sem fylgir námsspilinu og fylgiskjöl tengd því. Það er von okkar að námsspilið geti nýst sem flestum og að kennarar komi til með að nota spilið til þess að efla lestrarkennslu yngstu barna grunnskólans.