Óskráðar aðildarreglur í stjórnsýslurétti. Aðild stéttarfélaga að stjórnsýslumálum á grundvelli sameiginlegra hagsmuna félagsmanna

Abstract

Markmið þessarar ritgerðar er að gera grein fyrir þeim reglum sem gilda um aðild stéttarfélaga að stjórnsýslumálum. Sérstaklega verður leitast við að skýra þær reglur sem gilda þegar stéttarfélag nýtur aðildar á þeim grundvelli að verulegur hluti félagsmanna þess hefur beinna, verulegra, sérstakra og lögvarinna hagsmuna að gæta af úrlausn málsins. Í öðrum kafla ritgerðarinnar verður í stuttu máli gerð grein fyrir hugtakinu „aðili máls“ í stjórnsýslurétti, þýðingu þess og þeim skilyrðum sem menn þurfa að uppfylla til að geta notið aðildar að stjórnsýslumálum. Í þriðja kafla verður fjallað um félög og þeirra aðkomu að stjórnsýslumálum, gerð verður grein fyrir heimild félaga til að koma fram sem umboðsmaður aðila máls auk þess sem gerð verður grein fyrir þeim reglum sem gilda um aðild félaga í stjórnsýslurétti. Verður þá leitast við að skýra þau sjónarmið sem gilda þegar félagi er veitt aðild á grundvelli sameiginlegra hagsmuna félagsmanna þess og sú regla borin saman við sambærilega reglu einkamálaréttarfars. Í fjórða kafla ritgerðarinnar verður svo fjallað um stéttarfélög, þau sérsjónarmið sem gilda um aðild þeirra að stjórnsýslumálum og gerð grein fyrir því hvort einhver önnur sjónarmið gildi varðandi aðild þeirra félaga.