Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/16526
Móðuratferli og tengslamyndun móður og lamba hafa lítið verið rannsökuð á
Íslandi. Markmið rannsóknarinnar var að rannsaka þessa tvo þætti, ásamt því að
kanna hvort langtímatengsl væru til staðar. Bornir voru saman hópar af
venjulegum ám og forystuám. Rannsóknin var gerð á tveimur bæjum á
Ströndum, í Húsavík þar sem var hópur af venjulegum ám og á Innra Ósi, þar
sem bæði var hópur af venjulegum ám og forystuám.
Sauðburður var myndaður og burðaratferli ásamt atferli lambanna skoðað. Þegar
lömbin voru vikugömul var kannað hversu sterk tengsl væru milli lamba og
móður í þrautabraut. Fylgst var með ánum fyrsta sólarhringinn eftir að þær komu
út og kannað hversu vel ærnar héldu lömbunum hjá sér. Að lokum var fylgst
með ánum á frjálsri sumarbeit og þá sérstaklega kannað hvort skyldar ær héldu
sig á svipuðum slóðum á beitinni.
Helstu niðurstöður voru þær, að ekki var munur á milli hópa á körun lamba eða
öðru burðaratferli, en burðaratferli íslenskar áa virðist svipa til burðaratferlis hjá
Svarthöfðafé í Skotlandi (Scottish Blackface). Í þrautabrautinni kom fram að
forystuærnar virtust tengdari lömbum sínum heldur en venjulegar ær og þær
voru fljótari að finna lömbin. Fyrsta sólarhringinn úti voru það aftur á móti
Húsavíkurærnar sem héldu lömbunum næst sér. Sumarbeitarsvæða ánna voru
misstór. Húsavíkurærnar dreifðust á um 1200 ha en á Innra Ósi um 850 ha.
Ættarhópar í Húsavík héldu að mestu saman á beit en meiri dreifing var á
ættarhópum á Innra Ósi. Reiknuð stærð heimasvæða ánna var frá 100-1.950 ha.
Mikilvægt er að kanna frekar burðaratferli íslenskra áa og þann einstaklingsmun
sem þar virðist vera vegna mikilvægis þess fyrir lífslíkur lambanna jafnframt því
að kanna nánar áhrifaþætti dreifingar sauðfjár í sumarhögum, hvort ættrækni,
tengsl við landið eða gæði beitilands ráði þar mestu, vegna mikilvægis þess fyrir
nýtingu sumarhaganna.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
2008_MS_Hafdis_Sturlaugsdottir.pdf | 2.72 MB | Opinn | Heildartexti | Skoða/Opna |