is Íslenska en English

Lokaverkefni (Meistara)

Háskólinn á Akureyri > Hug- og félagsvísindasvið > Meistaraprófsritgerðir >

Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/1658

Titill: 
  • „Þegar tungumálið kemur, þá kemur allt“ : reynsla Kosovo-albanskra kvenna af að búa á Íslandi
Námsstig: 
  • Meistara
Útdráttur: 
  • Ritgerð þessi byggir á eigindlegri rannsókn á lífi og upplifun albanskra kvenna á
    Íslandi. Tilgangur rannsóknarinnar er að auka skilning þess fólks, sem konurnar hitta í
    sínu daglega lífi, á tilfinningum þeirra, viðhorfum og aðstæðum, en það eru m.a.
    kennarar, heilbrigðisstarfsmenn og aðrir opinberir starfsmenn. Gengið er út frá
    rannsóknarspurningunni: Hver er reynsla kvenna af Kosovo-albönskum uppruna af
    því að búa á Íslandi? Spurningin var opin og víðfeðm og er henni ætlað að opna á
    umræðu og hvetja til ígrundunar kvennanna, sem jafnframt eru meðrannsakendur. En
    það getur síðan leitt til enn fleiri spurninga og vangaveltna hjá þeim sem og
    rannsakanda.
    Gagnaöflun fór fram árin 2006 og 2007. Tekin voru tíu ýtarleg og opin viðtöl, í
    formi samræðna, við fjórar Kosovo-albanskar konur. Einnig var rýnihópur settur á fót
    þar sem þrjár kvennanna komu saman með rannsakanda og jafnframt voru hálf-opin
    viðtöl tekin við þrjá sérfræðinga, sem hafa þekkingu og reynslu af að vinna með
    Kosovo-Albönum, hver á sínu sviði. Gagnaöflun fól einnig í sér úttekt og greiningu á
    rannsóknum fræðimanna í málefnum innflytjenda og var þar meðal annars horft til
    Norðurlanda.
    Niðurstöður rannsóknarinnar leiða í ljós hve mikilvægt það er fyrir aðlögun
    innflytjenda að ná valdi á ríkjandi tungumáli samfélagsins. Takmörkuð íslensku- og
    jafnvel enskukunnátta og lítil þekking á íslenskum aðstæðum getur skapað mikla
    vanlíðan og kvíða hjá innflytjendum. Það getur orðið til þess að innflytjendur taki
    minni þátt í félagslegum samskiptum og athöfnum en þeir annars hefðu viljað.
    Ennfremur koma fram vísbendingar um að fullorðnum innflytjendum, sem eiga börn
    sem tala íslensku og túlka fyrir foreldra sína, sé sérstaklega hætt við að einangrast
    félagslega og menningarlega frá meirihluta samfélagsins. Foreldrarnir reiða sig á börn
    sín í margskonar samskiptum og þurfa fyrir vikið minna að kljást við nýtt tungumál
    og sinn eigin vanmátt gagnvart því.
    Rannsóknin bendir til þess að fólk, sem nær góðum tökum á nýju tungumáli og
    tekur virkan þátt í nærsamfélagi sínu, þrói með sér sveigjanlega etníska sjálfsmynd og
    samþætti eigin menningu nýrri menningu. Það verður til þess að þátttaka, hlutverk og
    möguleikar þess í samfélaginu aukast og stuðlar um leið að mikilvægu hlutverki þess í
    aðlögunarferli samfélagsins að breyttum aðstæðum.
    Niðurstöðurnar gefa margvíslega innsýn í tilveru, sjónarmið og aðstæður Kosovoalbanskra
    kvenna á Íslandi og fjölskyldna þeirra. Það er von mín að þessi reynsla og
    þekkingarmiðlun nýtist þeim, sem eiga náin samskipti við Kosovo-Albani eða aðra
    innflytjendur á Íslandi, sem og öðrum þeim sem áhuga hafa á fjölmenningarlegum
    málefnum. Einnig er það einlæg ósk mín að rannsóknin stuðli að enn frekari aðlögun
    Kosovo-Albana að íslensku samfélagi sem og annarra Íslendinga að Kosovo-
    Albönum og innflytjendum almennt.

Styrktaraðili: 
  • Vísindasjóður Félags leikskólakennara
Samþykkt: 
  • 14.7.2008
URI: 
  • http://hdl.handle.net/1946/1658


Skrár
Skráarnafn Stærð AðgangurLýsingSkráartegund 
„Þegar tungumálið kemur, þá kemur allt“. Reynsla kvenna af Kosovo_albönskum uppruna af að búa á Íslandi.pdf7.31 MBOpinn„Þegar tungumálið kemur, þá kemur allt“. Reynsla kvenna af Kosovo-albönskum uppruna af að búa á Íslandi-heildPDFSkoða/Opna