is Íslenska en English

Lokaverkefni (Meistara)

Háskóli Íslands > Félagsvísindasvið > Meistaraprófsritgerðir - Félagsvísindasvið >

Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/21050

Titill: 
  • Heilbrigðisréttur
Námsstig: 
  • Meistara
Útdráttur: 
  • Eins og alþjóð veit er heilbrigðisþjónusta oft takmörkuð í þeim skilningi að fjárveitingar geta nær aldrei dugað til að veita eins fullkomna heilbrigðisþjónustu og kostur er á. Sýnist svo sitt hverjum um hvernig þessum takmörkuðu gæðum skuli útdeilt og um það geta skapast deilur. Flest viljum við njóta heilbrigðisþjónustu þegar á reynir og hefur íslenska þjóðin, eða stjórnarskrárgjafinn öllu heldur, gengið svo langt að tryggja þann rétt í stjórnarskránni. Þessi réttur er þó ekki án takmarkana, eðli máls samkvæmt. Til að hann sé virkur, jafnræðis gætt, ásamt öðrum málefnalegum sjónarmiðum, þurfa að vera til staðar reglur, þ.á.m. málsmeðferðarreglur sem útfæra þennan rétt frekar. Þær hafa verið settar víðsvegar í lagabókstafnum, bæði í sérlögum og svo í almennari lögum svo sem stjórnsýslulögum og upplýsingalögum.
    Þessari ritgerð er ætlað að varpa ljósi á þessa flóknu réttarstöðu eins og frekast er unnt og tengja við skyldur þær sem alþjóðlegar mannréttindaskuldbindingar Íslands og stjórnarskráin gera til ríkisins. Með það að leiðarljósi verður heilbrigðisrétturinn skoðaður með stjórnsýslulegu viðmiði, réttaröryggi og réttarreglur í heilbirgðiskerfinu bornar saman við aðra þætti ríkisvaldsins og reynt að komast að því hvað einkennir heilbrigðisrétt.
    Markmið ritgerðarinnar í heild er að greina í grófum dráttum (1) réttinn til heilbrigðisþjónustu skv. 76. gr. stjórnarskrárinnar, (2) skipulag heilbrigðisþjónustu á Íslandi, og (3) stjórnsýslu heilbrigðismála á Íslandi með hliðsjón af meginreglum stjórnsýsluréttar.
    Réttarsvið heilbrigðisréttar er nokkuð víðfemt og hefur ekki verið skrifað mikið um það hérlendis og því verður farið breitt yfir sviðið í þeim tilgangi að draga upp nokkurs konar heildarmynd af heilbrigðisrétti á Íslandi. Það þýðir óhjákvæmilega að ekki er hægt að útlista ítarlega öll þau fjölmörgu lögfræðilegu álitaefni sem upp koma þegar heilbrigðiskerfið er skoðað heldur látið nægja að greina megindrætti.
    Þannig er lagt upp með að máta þær, málsmeðferðarreglur og að einhverju leyti efnisreglur, sem settar hafa verið í löggjöf um heilbrigðisþjónustu hér á landi við stjórnsýslulögin, óskráðar reglur stjórnsýsluréttarins og þær almennu kröfur sem gerðar eru í stjórnsýslurétti til réttaröryggis.
    Heildarmarkmiðið með þessari rannsókn er þá að veita yfirlit yfir stjórnsýslu heilbrigðismála. Þessi uppsetning ritgerðar er hönnuð til að ná því markmiði.

Samþykkt: 
  • 5.5.2015
URI: 
  • http://hdl.handle.net/1946/21050


Skrár
Skráarnafn Stærð AðgangurLýsingSkráartegund 
Heilbrigðisréttur.pdf10.55 MBOpinnHeildartextiPDFSkoða/Opna