Starfsmannaþróun í íslenskum fjármálafyrirtækjum: Áhrif fjármálabólu, efnahagshruns og tækninýjunga

Abstract

Kapítalískt kerfi og hugmyndafræði nýfrjálshyggju boða frjálsan markað og afskiptaleysi ríkisins. Með hnattvæðingu eykst aðgengi að frjálsum markaði með aukinni upplýsingatækni og auknu flæði milli ríkja. Á árunum 2003 til 2007 var uppsveifla í starfsmannafjölda íslenskra fjármálafyrirtækja sem rekja má til þenslu fjármálakerfisins í kjölfar einkavæðingar árið 1994. Fjöldi starfsmanna helstu viðskiptabanka (Glitnir, Kaupþing og Landsbankinn) landsins náði hámarki árið 2007. Sá fjöldi starfsmanna átti hins vegar eftir að taka umtalsverðum breytingum í kjölfar efnahagskreppu hérlendis, en í árslok 2008 höfðu um tuttugu prósent íslenskra bankastarfsmanna misst sitt starf og í kjölfarið hækkuðu tölur fyrir atvinnuleysi á Íslandi í allt að níu prósent. Mannauðstefna íslenskra banka á það sameiginlegt að setja þekkingu einstakra starfsmanna og upplýsingaflæði milli starfsmanna framarlega á svið og leggja metnað í símenntun starfsmanna svo þeir séu sem best hæfir til að fylgja þróun í þjóðfélaginu hverju sinni. Tækniþróun og bætt upplýsingatækni bankanna gefur viðskiptavinum möguleika á að sinna fjármálum rafrænt, ýmist í gegnum heimabanka eða með notkun smáforrita í símanum. Ný kynslóð hraðbanka er sjálfsafgreiðslubankar þar sem viðskiptavinir nýta einfaldari og hraðari leið til þess að leggja inn eða taka út. Bankaútibúum á hinum Norðurlöndunum hefur farið fækkandi síðustu ár og eru nú mun færri bankastarfsmenn á hverja þúsund íbúa miðað við Ísland. Á Íslandi eru um tíu bankastarfsmenn á þúsund íbúa en í Svíþjóð, svo dæmi sé tekið, eru þeir þriðjungi færri.