Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/2128
Markmið verkefnisins var að gera tilraun með skipulagt tónlistarstarf fyrir leikskólabörn undir tveggja ára aldri. Slíkt starf virðist ekki hafa fest sig í sessi fyrir yngstu börnin í leikskóla. Ástæða þess getur meðal annars verið að geta og hæfni ungra barna til að tileinka sér tónlist er oft vanmetin.
Tilraunarverkefnið fór fram á einum leikskóla og þátttakendur rannsóknarinnar voru sex leikskólabörn sem öll voru undir tveggja ára aldri þegar verkefnið hófst. Börnin mættu í skipulagðar tónlistarstundir átta sinnum á sex vikna tímabili. Í upphafi fékk hvert þeirra geisladisk til að taka með heim, með lögum sem notuð voru í tónlistarstundunum. Tvö viðtöl voru tekin við foreldra barnanna, eitt í upphafi og annað í lok tilraunarinnar. Í seinna viðtalinu voru foreldrar beðnir um að meta hvernig og hversu mikil viðbrögð börnin sýndu við lögunum þegar þau voru spiluð heima fyrir af geisladisknum. Auk þess var virkni þeirra og viðbrögð í tímum metin jafnóðum.
Niðurstöður tilraunaverkefnisins gefa til kynna að sú uppbygging á tónlistarstarfi sem stuðst var við hentar vel fyrir ung börn á leikskóla. Börnin sem tóku þátt í verkefninu brugðust jákvætt við tónlistinni, með söng og ýmsum hreyfingum, bæði í tónlistarstundum á leikskólanum og heima fyrir. Þau sýndu einnig miklar framfarir í virkni og þátttöku í tónlistarstundum. Lög með hreyfingum höfðuðu mikið til barnanna og fastur rammi með endurtekningum hentaði þeim vel.
Lykilorð: Tónlistarþroski, tónlistarstarf, tónlist með ungum börnum.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
lokaritgerð.pdf | 185.24 kB | Lokaður | Heildartexti | ||
Ágrip.pdf | 8.11 kB | Opinn | Ágrip | Skoða/Opna | |
Heimildir.pdf | 13.51 kB | Opinn | Heimildaskrá | Skoða/Opna |