Höfuðborg allra landsmanna? Orðræðugreining á umræðunni um Reykjavíkurflugvöll

Abstract

Í þessari ritgerð er skoðuð og greind orðræða íbúa landsbyggðarinnar annars vegar og höfuðborgarinnar hins vegar um framtíð Reykjavíkurflugvallar.Umræðan er skoðuð út frá kenningum Nilsson og Lundgren um orðræðu um sænska norðrið sem og kenningu Frouws um hollenska dreifbýlið. Saga Reykjavíkurflugvallar er skoðuð til að geta greint orðræðuna betur. Til skoðunar var umræðan eins og hún birtist í fjölmiðlum á árunum 2008 til og með 2016. Allt frá upphafi byggingar Reykjavíkurflugvallar hefur ríkt andstaða við staðsetningu flugvallarins og ekki var sátt um þá staðsetningu sem á endanum var byggt á. Í dag er landsvæðið í Vatnsmýrinni talið verðmætt og eru það ein helstu rökin með því að flytja flugvöllinn. Hins vegar hefur verið bent á að núverandi staðsetning sé ákjósanleg vegna nálægðar við sjúkrahús og þar af leiðandi að sjúkraflug sé starfrækt á flugvellinum. Skoðanir eru mismunandi á landsbyggðinni annars vegar og í höfuðborginni hins vegar og því er mikilvægt að komast að sátt, eigi að loka flugvellinum.