Stuðningur við jákvæða hegðun. Grunnlínumælingar hjá 8.-10. bekk í þremur grunnskólum og fyrstu inngripsmælingar í tveimur vorið 2009

Abstract

Hegðun barns í skóla getur skipt miklu máli fyrir barnið sjálft, samnemendur þess og starfsfólk skólans. Það að koma á heilstæðu hegðunarmótunarkerfi innan skólans sem kennarar og nemendur taka þátt í saman getur skapað betra vinnuumhverfi fyrir alla aðila. Eitt þeirra kerfa sem skilað hafa góðum árangri er Positive Behavior Support (PBS) eða Stuðningur við jákvæða hegðun. Kerfið miðar að því að auka æskilega hegðun nemenda með því að veita æskilegri hegðun jákvæða athygli. Í þessari ritgerð er fjallað um og gert grein fyrir hluta mælinga á áhrifum innleiðingar PBS í þremur skólum í Reykjanesbæ. Inngrip er hafið í tveimur skólanna en einn þeirra er ennþá í grunnlínu. Merkilegustu niðurstöður mælinganna eru að í báðum skólunum þar sem innleiðing var hafin hafði tíðni jákvæðrar athygli minnkað í kennslustund en aukist á almennum svæðum. Tíðni óæskilegrar hegðunar minnkaði á öllum svæðum innan skólanna eftir að inngrip hófst. Í báðum skólum hafði óviðeigandi hundsun starfsmanna minnkað. Það að óæskileg hegðun sé minni eftir að innleiðing hófst bendir til þess að kerfið sé að byrja að virka á hegðun allra í skólanum.