Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/3428
Rannsóknir á stellingajafnvægi kísilinnihaldandi sexhringja eru af skornum skammti ef
borið er saman við rannsóknir á súrefnis- og niturinnihaldandi sexhringjum. Með
tilkomu nýrra mæligagna fyrir stellingajafnvægi milli áslægrar og þverlægrar stellingar
einsetinna og 1,1-tvísetinna 1-silacyclohexanafleiða, ákváðum við að framkvæma
ítarlega rannsókn með tölvuútreikningum, með því takmarki að ná samræmi milli
kennilegra reikninga og tilraunaniðurstaðna. Skammtafræðilegir tölvureikningar eru
margs konar, en DFT reikningar eru sérlega hentugir fyrir mörg efnafræðileg vandamál.
Hefðbundnar DFT aðferðir hafa hins vegar ekki alltaf gefið ásættanlegar niðurstöður og
vandamál tengd DFT aðferðum á lífrænum sameindum hafa verið í brennidepli í
fagtímaritum nýlega. Ný kynslóð DFT aðferða getur hins vegar spáð fyrir um orkumun
stellinga mun nákvæmar en áður, skv. samanburði okkar við coupled cluster reikninga
og tilraunaniðurstöður.
Einnig voru rannsökuð, áhrif þess að bæta kísilatómi inn í einsetinn cyclohexanhring á
kerfisbundin hátt. Spáð var fyrir um orkumun fjölmargra silacyclohexana, sem innihéldu
allt frá einu kísilatómi upp í sex og mismunandi sethópa. Sumar þessara sameinda hafa
aldrei verið rannsakaðar, hvorki með tilraunum né reikningum. Stellingajafnvægi
kísilinnihaldandi sexhringja er skv. reikningum okkar, töluvert frábrugðið því sem þekkt
er fyrir cyclohexan og aðra heterohringi og niðurstöðurnar benda til þess að við eigum
enn talsvert eftir í land með að skilja stellingajafnvægi einfaldra lífrænna sameinda.
Orkuyfirborð ósetinna isilacyclohexanafleiða hafa áður verið kortlögð og ferlar fyrir umhverfingu stólforms í annað verið reiknaðir. Með notkun nýrra reikniaðferða til að finna söðulpunkta, voru ferlar endurbættir og reiknaðir á nákvæmari hátt en áður. Með tilkomu GED (gas electron diffraction) mælinga hafa byggingar sameindanna verið greindar og voru nýir tölvureikningar bornir saman við tengjalengdir og tengjahorn úr
tilraunum. Þá voru reikningar á myndunarvarma efnanna framkvæmdir og tilraunir gerðar til að herma flókin 1H NMR róf disilacyclohexana.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
Ragnar_Bjornsson_fixed.pdf | 4.63 MB | Opinn | Heildartexti | Skoða/Opna |