Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/4355
Gabbró frá námu við Breiðárlón hefur verið notað af Vegagerðinni í rofvarnir en ekki reynst nógu vel. Í þessu verkefni er rannsakað hvernig og hve mikil ummyndun er í gabbróinu og hvort hún hafi áhrif á endingu efnisins. Borkjarnar voru athugaðir, gerðar voru bergefnagreiningar, greiningar í örgreini og með smásjá. Einnig voru gerðar vatnsmælingar og álagspróf. Ummyndunarsteindir í sprungufyllingum voru greindar með röntgen. Reyndust sprungufyllingarnar aðallega innihalda kalsít en einnig fannst klórít, albít og epidót.
Kjarnarnir eru nokkuð brotnir á köflum. Við efnagreiningu reyndust þeir talsvert ólíkir að gerð. BRL1 er basískt gabbró með frumsteindasamsetninguna plagíóklas, pýroxen og oxíð. BRL2 reyndist vera ísúrt gabbró sem inniheldur steindirnar pýroxen, alk-feldspöt, oxíð, epidót og kvarts. Epidót og sennilega einnig alk-feldspat og kvarts, eru ummyndunarsteindir. Apatít fannst einnig í báðum kjörnum. Ilmenít kemur oft fyrir sem langir kristallar og sem afblöndunarstafir í magnetíti í báðum kjörnum. Í örgreini sást mesti munur á steindasamsetningu kjarnana í feldspötum; BRL1 inniheldur einungis plagíóklas en BRL2 aðallega alk-feldspöt.
Mæling sýndi að vatnsinnihald sýnanna var um 0.8 – 1.5 %. Ummyndunarsteindir, klórít og leirsteindir, innihalda 10-15 % vatn og út frá því má álykta að í sýnunum séu amk 15 % ummyndunarsteindir. Álagpróf sýndu að brotþolsstyrkur var undir meðallagi.
Niðurstöðurnar sýna að ummyndun er töluverð í kjörnunum það ásamt því að kjarnarnir eru talsvert sprungnir veldur minni brotþolsstyrk og lélegri endingu í varnargörðum.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
pdf_fixed.pdf | 42.32 MB | Opinn | Heildartexti | Skoða/Opna |