Þegar morgunstjörnurnar sungu saman gleðisöng og allir synir Guðs fögnuðu. Englar í Gamla testamentinu og Gyðingdómi

Abstract

Hugmyndin um engla er falleg. Það er eitthvað við engla sem fyllir menn andargift og vekur forvitni. Það endurspeglast í vinsældum þeirra á öllum sviðum listar.Englar mæta okkur víða í allri sinni himnesku dýrð í Gamla testamentinu. Þeir eru sýnileg tákn hins ósýnilega Guðs og birtast í ýmsum hlutverkum og birtingarmyndum: Andar, kerúbar, serafar, synir Guðs, himnesk hirð, morgunstjörnur og heita Mikael og Gabriel. Þeir standa næstir Guði og engin önnur sköpun stendur honum nærri. Hebreska hugtakið malak þýðir sendiboði en er notað yfir engla Jahveh. Hlutverk þeirra er eins og heitið gefur til kynna, að vera sendiboðar Guðs. Markmið ritgerðarinnar er að huga að nokkrum áhugaverðum einkennum englanna í Gamla testamentinu og skoða þróun þeirra innan þess. Einnig verður komið inn á trúarsögu Hebrea og guðfræði Gamla testamentisins sem tengjast englum þar sem byggð er brú yfir til Gyðingdóms.