Heilaáverki er algeng orsök fötlunar í heiminum. Þrátt fyrir háa tíðni heilaáverka hafa rannsóknir bæði í Bandaríkjunum og Bretlandi sýnt að þekkingu er ábótavant meðal almennings sem og heilbrigðisstarfsfólks um afleiðingar þeirra. Markmið rannsóknarinnar var að kanna þekkingu sálfræðinema á afleiðingum heilaáverka til að komast að því hvort markvissari fræðslu um efnið væri þörf. Niðurstöður rannsóknarinnar voru einnig bornar saman við niðurstöður nýlegra erlendra rannsókna. Þátttakendur rannsóknarinnar voru 278 sálfræðinemar á fyrsta og öðru námsári við Háskóla Íslands. Þeir svöruðu 27 atriða lista um afleiðingar heilaáverka. Niðurstöður voru að þrátt fyrir að sálfræðinemendurnir höfðu betri þekkingu á efninu en almenningur í fyrri rannsóknum voru ranghugmyndir enn til staðar með tilliti til meðvitundarleysis/dás, bata og óminnis í kjölfar heilaáverka. Því má álykta að fræðsla um langvarandi og oft óafturkræfar afleiðingar heilaáverka þurfi að vera markviss til að útrýma algengum ranghugmyndum um þær meðal sálfræðinemenda.