Endurskipulagning ríkisstofnana á Íslandi 2000-2011

Abstract

Helsta viðfangsefni þessarar ritgerðar er að svara því; Hvers vegna og hvernig endurskipulagningar íslenskra ríkisstofnana áttu sér stað. Í því skyni er tímabilið 2000-2011 skoðað. Höfundur mun leitast við að gera grein fyrir helstu áhrifaþáttum þegar kemur að endurskipulagningu ríkisstofnana. Skoðuð verða 32 tilvik og þau greind með skipulegum hætti. Greiningin gengur út á að skilgreina helstu markmið sem lagt var upp með í hverju tilviki. Í framhaldi af því er farið í skipulagða greiningu á því hvort, og þá hvernig, markmið endurskipulagningar voru skilgreind og útskýrð, og hvernig vinna átti að því að ná þeim. Til mælinga voru notaðir fimm mælikvarðar sem mótaðir voru út frá fræðilega hluta ritgerðarinnar.Samkvæmt fyrirliggjandi gögnum rannsóknarinnar virðast þau benda til þess að undirbúningi endurskipulagningar ríkisstofnana á tímabilinu hafi í sumum tilvikum verið ábótavant. Af gögnum rannsóknarinnar má einnig draga þá ályktun að í sumum tilvikum virðist sem lítil innistæða hafi verið fyrir fjárhagslegum markmiðum um hagræðingu og sparnað. Niðurstöður gefa þó til kynna að vinnubrögð stjórnsýslunnar vegna endurskipulagningar stofnana hafi orðið markvissari eftir því sem leið á tímabilið.