Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/13149
Í þessari ritgerð er fjallað um ferðatíma fólks á höfuðborgarsvæðinu til og frá vinnu. Kynnt er til sögunnar hugtakið “Ráðstöfunartími vegna ferða” en þar er ferðatími metinn með tilliti til þess tíma sem ferðalangur eyðir í að fjármagna ferðalag sitt. Eftir bestu vitund er þetta nálgun sem hefur ekki verið notuð í samhengi við ferðalög einstaklinga. Þá verður reiknaður ráðstöfunartími ferða meðalmanneskju á höfuðborgarsvæðinu til og frá vinnu, út frá gögnum frá Hagstofunni annarsvegar og Land-ráð sf. hinsvegar. Í ljós kemur að ef notuð er einkabifreið eyðir meðalmanneskjan meiri tíma í vinnu við að fjármagna ferðina en í ferðina sjálfa til og frá vinnu. Einnig er sett upp tilfellalýsing þar sem ferðatími og kostnaður er metinn fyrir tíu leiðir sem valdar voru af handahófi. Þar er skoðaður ferðatími til og frá vinnu, ráðstöfunartími vegna ferða yfir daginn og kostnaður yfir árið. Í öllum tilfellum tekur fjármögnun á bílferð lengri tíma en aksturinn sjálfur hjá manneskju á meðallaunum. Því næst er kynnt einfalt verkfæri sem almenningur getur notað til að meta eigin kostnað sem og þann tíma sem það ráðstafar í ferðir sínar útfrá eigin tímakaupi. Er þessu verkfæri ætlað að gefa nýtt sjónarhorn á þessi útgjöld, en uppsetning þess og þær upplýsingar sem það gefur er ætlað að verka á ákveðin hugsanaferli. Þessi ferli eru annarsvegar Ýking afsláttar yfir tíma (Hyperbolic Discounting) og hinsvegar Hugarbókhald (Mental Accounting) sem eru algeng þegar fólk hugsar um kostnað og peninga. Að lokum eru teknir til hlutir ótengdir kostnaði sem höfundur telur að skipti miklu máli í umræðunni um val á ferðamáta innan höfuðborgarsvæðisins.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
jonatan_atli _sveinsson_BS.pdf | 681.66 kB | Opinn | Heildartexti | Skoða/Opna |