Viðskipti tengdra aðila út frá sjónarhóli almennra hluthafa

Abstract

Ritgerðin fjallar um viðskipti tengdra aðila í íslenskum félagarétti með tilliti til almennra hluthafa. Út frá sjónarhóli hluthafa er ætlunin að svara eftirfarandi spurningum: Hvaða lagareglur gilda um viðskipti félags við ráðandi aðila? Hvernig berast upplýsingar til almennra hluthafa um málefni félags þ.m.t. vitneskja um viðskipti þess við tengda aðila? Hvernig geta almennir hluthafar nýtt sér réttindi sín innan félags til að sporna gegn óeðlilegum viðskiptum af þessum toga og, að lokum, hvaða úrræði standa þeim til boða ef allt annað þrýtur?Umfjöllunin tekur fyrst og fremst mið af reglum hlutafélagalaga nr. 2/1995 og einkahlutafélagalaga nr. 138/1994. Uppbygging ritgerðarinnar er í grófum dráttum í samræmi við spurningar að ofan, en stuðst er við eftirfarandi skipulag.Í 1. kafla er fjallað almennt um viðskipti tengdra aðila. Skilgreint verður hvað felst í hugtakinu og hvernig viðskipti af þessari tegund birtast í framkvæmd. Í 2. kafla er fjallað um þær reglur í lögunum sem mæla fyrir um hvernig ráðandi aðilar innan félaga eigi að hegða sér m.t.t. viðskipta félagsins við sig eða tengda aðila.Í 3. kafla er fjallað um upplýsingar um málefni félags, nánar tiltekið hvernig upplýsingar um hag og rekstur berast frá stjórnendum til hluthafa félags. Í 4. kafla er fjallað um þær reglur í hlutafélagalögum sem ætlað er að efla hluthafa innan félags, þ.e. sem ætlað er að styrkja hluthafa í sessi sem eiginlega eigendur félagsins og sjá til þess að vilji þeirra komist þar til skila.Ályktun og lokaorð eru síðan tekin saman í 5. kafla.