is Íslenska en English

Lokaverkefni (Bakkalár)

Landbúnaðarháskóli Íslands > Umhverfisdeild (2005-2016) > B.S. verkefni - Umhverfisdeild >

Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/15573

Titill: 
  • Fuglafána Vatnshamravatns í Borgarfirði.
Námsstig: 
  • Bakkalár
Leiðbeinandi: 
Útdráttur: 
  • Markmið þessarar rannsóknar var að safna gögnum um fuglalíf Vatnshamravatns í Borgarfirði en vatnið er hluti af fuglafriðlandinu í Andakíl. Ekki er vitað til þess að slík rannsókn á fuglalífi vatnsins hafi farið fram áður. Mikil framræsla átti sér stað í kringum vatnið á árum áður og nú eru hugmyndir á lofti um endurheimta vatnið og hækka vatnsyfirborð þess í sitt náttúrulega horf. Þessar hugmyndir eru þó enn á frumstigi. Gögnin sem fengust í þessari rannsókn munu mögulega nýtast til ákvarðanatöku um framtíð svæðisins og sem fræðsluefni, m.a. fyrir skóla, almenning og ferðamenn.
    Talningar fóru fram frá þremur punktum við Vatnshamravatn sumarið 2011. Talið var kl. 9:00 að morgni, tvisvar í mánuði frá apríl fram í ágúst, alls níu skipti. Veðurfar var einnig skráð. Alls sáust 33 tegundir á vatninu í þessi níu skipti, að meðaltali 10-11 tegundir í senn. Flestir einstaklingar voru í fyrstu talningunni í apríl en alls sáust 738 einstaklingar á talningartímanum, að meðaltali 82 í hvert skipti.
    Flestir einstaklingar sáust af grænlenska blesgæsarstofninum (Anser albifrons flavirostris) á og við vatnið en þær koma við í friðlandinu að vori og hausti og sáust því eðlilega aðeins í talningunum í apríl. Aðrar algengustu tegundirnar voru grágæs (Anser anser), rauðhöfðaönd (Anas penelope), brandönd (Tadorna tadorna), álft (Cygnus cygnus), stokkönd (Anas platyrhynchos), kría (sterna paradisaea), hettumáfur (Larus ridibundus), svartbakur (Larus marinus) og stelkur (Tringa totanus). Álft var auk þess eina tegundin sem sást í öll talningarskiptin en tólf tegundir sáust aðeins einu sinni á talningartímabilinu.
    Nauðsynlegt væri að fara út í frekari rannsóknir á lífríki Vatnshamravatns og nánasta nágrenni ef fara ætti í endurheimt. Kanna þyrfti fæðuframboð vatnsins fyrir fuglalíf sem og fæðuframboð vatnsbakkanna. Auk þess þyrfti að kanna og kortleggja varp fugla á svæðinu og þá sérstaklega í hólmum vatnsins en þeir voru ríkulega nýttir á talningartímanum. Endurheimtina þyrfti að hanna vandlega svo að hún rýri ekki kosti Vatnshamravatns fyrir fuglalíf. Mögulega væri hægt að fara út í einhverja útfærslu af hálfri endurheimt þar sem að vatnsyfirborðið væri ekki hækkað alveg upp að sínum gamla vatnsbakka. Með því væri hægt að halda í flatarmál hólmanna í vatninu sem og hluta af sefbökkum sem eru mögulega mikilvæg varpsvæði.

Samþykkt: 
  • 6.6.2013
URI: 
  • http://hdl.handle.net/1946/15573


Skrár
Skráarnafn Stærð AðgangurLýsingSkráartegund 
2013_BS_Alfheidur_Sverrisdottir.pdf2.34 MBOpinnHeildartextiPDFSkoða/Opna