Afbrot og fangelsun ungmenna. Félagslegar afleiðingar

Abstract

Í heimildaritgerð þessari er fjallað um afbrot og fangelsun ungmenna á aldrinum 15 til 18 ára. Markmið með ritgerðinni er að veita innsýn inn í þá félagslegu þætti sem ýta undir afbrotahegðun ungmenna. Fjallað er um þær félagslegu afleiðingar sem ungmenni verða fyrir við fangelsun og hvernig hægt er að koma í veg fyrir áframhaldandi afbrotahegðun. Fangelsismálastofnun er skoðuð með hliðsjón af ungmennum í fangelsum og einnig er farið yfir þau úrræði sem Barnaverndarstofa hefur til boða fyrir börn í afbrotum. Niðurstöður heimildaritgerðarinnar sýna að fjölmargir þættir hafi áhrif á hvort ungmenni brjóti af sér eða ekki. Bágar heimilisaðstæður, slæmar fyrirmyndir, ótraust nærumhverfi og vanræksla eru allt þættir sem hafa áhrif á það hvort ungmenni leiðast út í afbrot eða ekki. Niðurstöður ritgerðarinnar gefa einnig til kynna að ungmenni sem lenda í fangelsi verða fyrir fjölmörgum félagslegum áhrifum. Fordómar og skilningsleysi samfélagsins kemur í veg fyrir fulla þátttöku ungmennis í námi og starfi. Einnig er hætta á því að samfélagið stimpli ungmennið sem afbrotamann sem leiðir til enn frekari afbrotahegðunar. Úrræði Barnaverndarstofu eru fjölbreytt og ná til fjölbreytts hóps ungmenna í afbrotum. Til þess að koma í veg fyrir afbrotahegðun ungmenna er mikilvægt að efla nærumhverfi hans og fjölga þeim fyrirmyndum sem styrkja jákvæða hegðun.