Starfsmannavelta, áhrifaþættir og þróun hennar hjá IKEA á Íslandi á árunum 2007-2013

Abstract

Í þessu verkefni er fjallað um starfsmannaveltu, helstu áhrifaþætti hennar og þær leiðir sem hægt er að fara til að lágmarka slíka veltu. Greinarmunur er gerður á því hvort veltan sé jákvæð, neikvæð, sjálfviljug eða ósjálfviljug ásamt því að farið er yfir kostnað starfsmannaveltu, þróun og hvernig hún fylgir atvinnuástandi og hagsveiflunni á hverjum tíma. Verkefnið var unnið í samstarfi við IKEA á Íslandi þar sem ætlunin var að kanna hvernig haldið væri utan um starfsmannamál hjá IKEA og hvaða áhrif efnahagshrunið 2008 hafði á starfsmannaveltu fyrirtækisins.Viðtal var tekið við tengilið fyrirtækisins og í framhaldinu var könnun lögð fyrir starfsfólk þar sem spurt var út í áhrifaþætti starfsmannaveltu í tengslum við þau fræði sem fjallað er um.Niðurstöður rannsóknar leiddu í ljós að vel er haldið utan um starfsmannamál hjá IKEA. Starfsmannastefnan er skýr og rík áhersla er lögð á vellíðan í starfi, jákvæða samskiptahætti og virðingu við hvort annað. Innan veggja IKEA starfar þéttur hópur fólks sem tekist hefur að mynda vináttutengsl sín á milli og byggja þannig upp ánægju í starfi. Í lokin er farið yfir helstu áhættuþætti starfsmannaveltu meðal núverandi starfsmanna og tillögur að úrbótum bornar fram. Lykilorð: Starfsmannavelta, Starfsánægja, Mannauðsstjórnun, Starfsmannastefna, Starfsmannastjórnun.