Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/20306
Viðfangsefni ritgerðarinnar er að varpa ljósi á löggjafarstarf í samgöngumálum á tímabilinu 1971-2000, hvaða aðilar áttu frumkvæði að þingmálum og mótuðu meðferð þeirra og innihald. Hér er kastljósinu beint að samspili Alþingis og framkvæmdarvalds og þá sérstaklega hlutverki stjórnsýslu. Enn fremur er athyglinni beint að útgjaldafrekum framkvæmdum og tekið dæmi af ákvarðanaferli við gerð áætlana um jarðgangagerð á áttunda og níunda áratugi síðustu aldar. Í því sambandi er leitast við að svara því hverjir í raun mótuðu almennt stefnuna í málaflokkum ráðuneytis. Metið verður hvort Alþingi í löggjafarstörfum sínum sé háð ríkisstjórnum (framkvæmdarvaldinu), sé nokkurs konar „afgreiðslustofnun“ fyrir ríkisvaldið. Eða hvort þessu er ef til vill öðru vísi varið, að ríkisstjórn og ráðherrar séu háðir vilja Alþingis á hverjum tíma við afgreiðslu þingmála.
Leitað var fanga í prentuðum og óprentuðum heimildum (einkum á vefum Alþingis og stofnana samgönguráðuneytisins).
Meginniðurstaða rannsóknarinnar er að ekki verður séð við athugun á þeim þingmálum samgönguráðuneytisins sem tekin voru til umfjöllunar í þessari ritgerð að það hafi hallað á Alþingi við vinnslu og afgreiðslu þeirra og víðs fjarri að álykta að Alþingi hafi verið „afgreiðslustofnun“ fyrir ríkisvaldið (samgönguráðuneytið). Mótun og meðferð þingmála fór fram í nánu samspili ráðuneytis og Alþingis. Enn fremur er það niðurstaða höfundar ritgerðarinnar að þáttur hagsmunaaðila við undirbúning og vinnslu þingmála var víða verulegur og því ekki hægt að álykta annað en að þeir hafi átt töluverðan þátt í mótun stefnunar í samgöngumálum á því tímabili sem hér um ræðir.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
HSK BA-ritgerð lokaútgáfa.pdf | 864.88 kB | Opinn | Heildartexti | Skoða/Opna |