Kvótaflóttamenn og aðlögun í nýju landi. Hvernig tilheyrum við stað?

Abstract

Í þessari ritgerð er leitast við að gera grein fyrir stöðu kvótaflóttamanna í heiminum í dag. Kvótaflóttamenn eru þeir flóttamenn sem ekki geta snúið aftur til síns heimalands og er boðið að setjast að í þriðja ríki með svokallaðri endurbúsetu (e. resettlement). Í dag taka 27 ríki á móti hópum kvótaflóttamanna árlega. Í ritgerðinni er fjallað um gildandi regluverk um vernd þeirra og móttökur í nýju landi. Rýnt er í hugtök sem hafa verið mannfræðingum í flóttamannafræðum hugleikin s.s. rými og staður og hvaða merkingu ,,að tilheyra stað“ getur haft þegar fólk þarf að yfirgefa heimaland sitt, búa í flóttamannabúðum og/eða hefja nýtt líf í kjölfar endurbúsetu (e. resettlement). Í seinni hluta ritgerðarinnar er svo vikið að kvótaflóttamönnum á Íslandi. Litið er á sögu verndar og þegar rýnt er í stærð hópa og umfang verndar sjáum við að íslensk stjórnvöld gætu gert betur og fjölgað þeim sem boðið er að setjast að á Íslandi. Margt bendir samt til þess að Íslendingar standi sig vel í þessu starfi en betur má ef duga skal.