Ferðaþjónusta í Kötlu jarðvangi. Er sjálfbærni höfð að leiðarljósi?

Abstract

Takmarkalaus áhugi erlendra ferðamanna á íslenskri náttúru og menningu hefur orsakað mikla fjölgun í komum erlendra ferðamanna til landsins á þessum allra síðustu árum. Mikill meirihluti þeirra ferðamanna sem til landsins koma ferðast um Suðurland Íslands og margir hverjir um mjög svo viðkvæma náttúru þess svæðis. Þörfin fyrir ábyrgð, vöktun og stýringu á ferðaþjónustuaðilum og ferðamönnum hefur því aldrei verið meiri. Í þessari rannsókn verður kannað hvort ferðaþjónustufyrirtæki sem starfa innan Kötlu jarðvangs leggi áherslu á sjálfbæra þróun í sinni starfsemi. Kannað verður hvort fyrirtækin séu þátttakendur í umhverfisstjórnunarkerfum og hvert álit þeirra sé á slíkum kerfum. Við gagnaöflun var notast við eigindlegar rannsóknaraðferðir en rannsóknin byggir á átta viðtölum sem tekin voru við forsvarsmenn ferðaþjónustufyrirtækja sem starfa í Kötlu jarðvangi eða bjóða upp á ferðir innan hans. Niðurstöður verkefnisins benda til þess að talsverður áhugi sé meðal ferðaþjónustufyrirtækja sem starfa innan Kötlu jarðvangs að gerast þátttakendur í gæða- og umhverfisstjórnunarkerfum. Niðurstöður rannsóknarinar benda þó til þess að skortur sé á þekkingu meðal ferðaþjónustufyrirtækja á hlutverki mælinga í þróun sjálfbærrar ferðaþjónustu en flest fyrirtækin telja sig nú þegar vera að bjóða upp á og stuðla að slíkri ferðaþjónustu.