Aðfangakeðjur og vörustjórnun. Öryggi, öryggisbrestir og flöskuhálsar

Abstract

Í fræðiritgerð þessari er fjallað um vörustjórnun og stjórnun aðfangakeðju með áherslu á almenna fræðslu, öryggi og öryggisbresti innan aðfangakeðja. Einnig er fjallað um þær áskoranir, eða flöskuhálsa, sem vörustjórnendur og stjórnendur aðfangakeðja þurfa að kljást við á degi hverjum. Leitast er við að svara tveimur rannsóknarspurningum; annars vegar hver munurinn á vörustjórnun og stjórnun aðfangakeðja sé og hins vegar hvaða vandamál geti komið upp við stjórnun slíkra keðja. Rannsóknir sýna að almennt telji fólk að vörustjórnun og aðfangastjórnun séu tvö mismunandi heiti yfir sömu greinina, en greitt er úr þeim misskilningi í ritgerðinni. Einnig sýna rannsóknir að með vaxandi alþjóðavæðingu og aukinni hættu í formi hryðjuverka og þjófnaðar er í mörg horn að líta þegar kemur að stjónun aðfanga- og vörukeðja. Farið er yfir fimm helstu öryggisbresti sem aðfangakeðjur verða fyrir og einnig er bók Eli Goldratt, The Goal, krufin og kenning hans um flöskuhálsa útskýrð. Niðurstöður sýna að munurinn á stjórnun aðfangakeðju og vörustjórnun sé sá að stjórnun aðfangakeðju er mun umfangsmeiri en vörustjórnun. Stjórnun aðfangakeðju felur í sér alla þætti sem tengjast uppsprettu, útvegun og úthlutun á varningi, á meðan vörustjórnun sér um að flytja farminn frá einum stað til annars og fylgjast með birgðastöðu. Niðurstöður sýna einnig að þau vandamál sem komið geta upp við stjórnun vöru- og aðfangakeðja eru til dæmis öryggisáskoranir og flöskuhálsar. Breyting hefur orðið á öryggisráðstöfunum innan aðfangakeðja. Öryggisáskoranir innan slíkra keðja má flokka í fimm víddir og eru þær; virði, hraði, breytileiki, sýnileiki og varnarleysi. Kenning Eli Goldratt um flöskuhálsa er notuð sem aðferð til að koma auga á takmarkandi þætti, eða flöskuhálsa, sem koma í veg fyrir að markmiðum innan fyrirtækja sé náð. Kenningin snýst um að bæta slíka þætti þar til þeir eru ekki lengur heftandi.