Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/2278
Þessi ritgerð er fræðilegur hluti meistaraverkefnis í blaða- og
fréttamennsku við Háskóla Íslands. Í ritgerðinni er fjallað um
dægurmenningu vestræns samfélags og hún skilgreind, með áherslu á
kvennatímarit. Fjallað er um áhrif þessarar tilteknu menningar á líf fólks
og hugmyndir fræðimanna um menningarleg yfirráð hennar. Farið er yfir
birtingarmyndir kvenna í kvennatímaritum almennt, uppbyggingu þessara
blaða sem og þær staðalmyndir kvenna sem í þeim eru.
Rannsókn ritgerðarinnar er tvískipt. Annars vegar er gerð rannsókn á
tveimur íslenskum kvennatímaritum, Nýju Lífi og Vikunni. Skoðað er
hvernig blöðin reyna að höfða til kvenna, hvaða birtingarmyndir kvenna
koma fram í þeim og hvort þær byggi á ákveðnum staðalmyndum. Einnig
er tenging milli auglýsinga og innihalds tímaritanna skoðuð. Þessi hluti
rannsóknarinnar styðst við innihaldsgreiningu, en hún er skilgreind sem
skipulögð greining á innihaldi greina, ímynda og annarra menningarlegra
gagna. Með þessu er hægt að fá skýra mynd af því hvernig blöðin eru
uppbyggð í myndum og máli og sjá hvort áherslubreytingar hafa orðið á
þessum atriðum á rannsóknartímabilinu.
Hins vegar var fjórum ritstjórum, tveimur frá hvoru tímariti, sendur
spurningalisti þar sem þeir voru spurðir út í ritstjórnastefnu sína, hvernig
þeir hefðu reynt að höfða til kvenna með efnisvali og myndum, hvernig
þeir skilgreindu markhóp sinn og hvernig auglýsingar voru valdar í blöðin.
Niðurstöður leiddu í ljós að reynt er að höfða til kvenna í gegnum
reynslusögur og frásagnir af konum. Þær birtingarmyndir kvenna sem
koma fram í tímaritunum eru helst af framakonum, fórnarlambi,
húsmæðrum, mæðrum og fegurðardrottningum. Mjög breiður hópur
kvenna er tekin fyrir í þessum blöðum, bæði hvað varðar aldur, störf, stétt
og útlit og er því ekki hægt að segja að blöðin gangist upp í ákveðnum
staðalmyndum um konur, að öðru leyti en að reyna að höfða til þeirra sem
tilfinningaverur. Uppsetning blaðanna bendir til þess að gert sé út á þá
staðalmynd að konur geti illa einbeitt sér að einum hlut í einu. Bein
tenging er á milli auglýsinga og innihaldi blaðanna, en auglýsingarnar
gerðu, margar hverjar, hinni ungu, grönnu konu hátt undir höfði ásamt því
að spila á kynferðislega undirtóna. Ritstjórar blaðanna gátu ekki skilgreint
konur sem einn ákveðin markhóp, en reyndu að höfða til þeirra á
persónulegum nótum og völdu myndefni í blöðin í samræmi við það. Ekki
virtust öll blöðin vera með ákveðna auglýsingastefnu. Þær breytingar sem
urðu á blöðunum á rannsóknartímabilinu fólust aðallega í aukningu á
reynslusögum kvenna, meiri nekt í ákveðinni tegund auglýsinga og
brotakenndari uppsetningu.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
IN_fixed.pdf | 321.73 kB | Opinn | Heildartexti | Skoða/Opna |