Tónlist er þroskandi fyrir manneskjuna. Hún býr yfir ákveðnu innihaldi og sammannlegum tilfinningum. Með því að miðla bæði innihaldi og tilfinningum
hennar, gefst uppalandanum tækifæri til að hafa áhrif á viðhorf barna til tónlistar og auka þroska þeirra. Hlutverk uppalandans tel ég vera að miðla eiginleikum tónlistar áleiðis til barna með það að markmiði að börn fái sem breiðastan skilning á tónlist og myndi eigin skoðanir á þvi hvernig þau vilji nálgast hana. Ég reyni að varpa ljósi á þær andstæður sem liggja í hugmyndafræði Umbótastefnunnar annarsvegar og „Konservatoriestílsins“ hinsvegar. Ég fjalla einnig um hvernig ólík hugmyndafræði í tónlistarlegu uppeldi hefur áhrif á viðhorf uppalenda og barna til tónlistar.