Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/2952
Tilgangur þessa verkefnis var að rannsaka hvaða þættir hafa áhrif á sjúklingaánægju
meðal sjálfræðissviptra einstaklinga. Hugtakið sjúklingaánægja hefur unnið sér sess við mat á gæðum þjónustu í heilbrigðiskerfinu en á síðustu árum hefur áhugi á sjónarhorni notenda aukist. Notuð var eigindleg rannsóknaraðferð sem nefnist túlkunarfræði við öflun og úrvinnslu gagna. Tekin voru viðtöl við fimm sjúklinga á sérhæfðri endurhæfingargeðdeild LSH og notast var við s.k. þægindaúrtak í samvinnu við deildarstjóra. Við úrvinnslu gagna
komu fram sex þemu, þ.e. að vera virt og venjuleg manneskja, að vera tilneyddur, að vera
heftur af reglum, hlustun, samræður og skilningur starfsfólks, að búa við stöðugt eftirlit og
vera ekki treyst og öryggi, rútína og stofnanalegt umhverfi.
Niðurstöður rannsóknarinnar voru að sjúklingum fannst sjálfræðissvipting mjög gróft
inngrip sem erfitt væri að sætta sig við. Þeim fannst reglur strangar, eftirlit óþægilega mikið
og niðurlægjandi. Þeim fannst einnig skorta virðingu í framkomu við þá, starfsfólk ekki
hlusta á sig, þeir ekki geta átt innilegar samræður við starfsfólk og þeir töldu sig ekki geta
treyst starfsfólki að öðru leyti en því að það héldi hlutunum fyrir sjálft sig.
Rannsakendur telja að þarft sé að gera frekari rannsóknir á þáttum sem tengjast
sjúklingaánægju meðal sjálfræðissviptra sjúklinga svo rödd þeirra fái að heyrast og meta
megi gæði þjónustunnar við þá.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
Sjúklingaánægja_fixed.pdf | 2.57 MB | Opinn | Heildartexti | Skoða/Opna |