Þættir sem hafa áhrif á lengd stjórnarmyndunarviðræðna: belgísku kosningarnar 2007

Abstract

Þessi ritgerð fjallar um þá þætti sem hafa áhrif á lengd stjórnarmyndunarviðræðna, og þá sérstaklega hvaða þættir voru fyrir hendi í stjórnarmyndunarviðræðunum sem áttu sér stað í Belgíu eftir kosningarnar þar í landi árið 2007. Ég byrja á því að fara yfir helstu kenningar sem fram hafa komið um efnið. Síðan fer ég yfir sögu tungumálaspennunnar sem hefur verið í Belgíu frá því að hún var sjálfstætt ríki. Ástæðan er að þrátt fyrir þá þætti sem raktir eru í kenningunum sem ég nefndi áðan, tel ég að megin ástæðan fyrir því að stjórnarmyndunarviðræðurnar taka svona langan tíma í landinu, eigi rætur sínar í sögu þess og spennunni sem ríkir milli tungumálasamfélaganna þar. Ég kemst að þeirri niðurstöðu að Belgía uppfylli nánast alla þá þætti sem nefndir eru í kenningunum, en þar að auki er ljóst að spennan milli Flæmingja og frönskumælandi Belga er gríðarleg og hún setur sitt mark á þessar viðræður. Ég tel að ein helsta leiðin til þess að stytta stjórnarmyndunarviðræður í Belgíu sé að leysa vandamálin sem eru milli þessara tveggja samfélaga. Annars munu stjórnarmyndunarviðræðurnar ávallt taka langan tíma þar í landi.