ÍslenskaenEnglish

Aðilar að Skemmunni

Leit eftir:


LokaverkefniHáskóli Íslands>Hugvísindasvið>B.A. verkefni>

Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/3429

Titill

Barnavinur mesti? Um kristnifræði- og trúarbragðafræðikennslu í skyldunámi á Íslandi

Útdráttur

Undanfarin ár hefur íslenskt samfélag einkennst af æ alþjóðlegri blæ, með aukinni fjölbreytni í menningarlífinu. Á sama tíma hefur efnahagslegur uppgangur verið mikill og fátækt er orðin minna áberandi en áður var. Þessum breyttu aðstæðum í samfélaginu hefur fylgt vaxandi umræða um stöðu trúarinnar á opinberum vettvangi og í lífi fólks. Því hefur verið haldið fram að trúin hafi minna vægi á uppgangstímum og sumir telja aukinn fjölda innflytjenda gefa til kynna að staða kristninnar sé að veikjast, einkum vegna vaxandi fjölbreytileika í trúarlífinu. Með því að halda uppi kennslu í kristnum fræðum í grunnskólum landsins sé því vegið að trúfrelsi og mannréttindum nemenda og fjölskyldna þeirra; fagið kristnifræði eigi ekki lengur við í heimi þar sem önnur trúarbrögð, sem og trúleysi, hafi meiri hylli að fagna en hin fyrrum einráða kristna kirkja. Í því ljósi eigi einkenni kristins átrúnaðar heldur ekki heima í grunnskólalögum eða á öðrum opinberum vettvangi.
Í þessari ritsmíð verður fjallað um þessa umræðu; kristnifræði- og trúarbragðafræðikennslu í skyldunámi á Íslandi. Þótt um víðan völl sé að fara, verður umfjöllunin hér takmörkuð við það sem mest ber á í ræðu og riti varðandi umræðuna. Í fyrsta kafla verður í stórum dráttum farið yfir sögu kristnifræðslu á Íslandi, frá upphafi til dagsins í dag og kannað hvaða markmiðum lög og námskrár hafa sett faginu.
Í öðrum kafla verður staða þjóðkirkjunnar og kristinnar trúar skoðuð, einkum með því að rýna örlítið í trúarlíf landsmanna. Auk þess verður kristnifræði- og trúarbragðafræðikennslu gerð skil, fyrst í nokkrum löndum sem Íslendingar bera sig gjarnan við og svo á Íslandi.
Þriðja kafla er ætlað að vega og meta rök með og á móti kristnifræði- og trúarbragðafræðikennslu í grunnskólum og gerð grein fyrir þeim röddum sem hæst heyrist í, í þeim rökræðum.
Fjórði og síðasti kaflinn fjallar um frumvarp menntamálaráðherra, þar sem hið gamalgróna hugtak, „kristilegt siðgæði“, er fellt brott úr markmiðsgrein grunnskólalaganna. Farið verður yfir skilgreiningu hugtaksins og hugsanleg tengsl þess við brot á trúfrelsisákvæði stjórnarskrárinnar og þar með við mannréttindabrot. Siðgæði og siðfræði veða gerð náin skil og fjallað um hugmyndir fræðimanna um hið kristna siðgæði og kristnifræði-, trúarbragðafræði- og siðfræðikennslu barna.
Að lokum verða umræðan og rökfærslurnar teknar saman í niðurstöðu en lokaorð setja svo endapunktinn á ritgerðina.

Birting
10.10.2008


Skrár
NafnRaðanlegtStærðRaðanlegtAðgangurHækkandiLýsingRaðanlegtSkráartegund
Palina_Sigridur_Si... .pdf477KBOpinn Heildartexti PDF Skoða/Opna