Lokaverkefni okkar er þríþætt, það inniheldur fræðilega greinargerð um sorg barna auk barnabókarinnar "Afi á stað í hjarta mínu" og kennsluheftis í tengslum við bókina. Barnabókinni ásamt kennsluheftinu er ætlað að styðja við starf í tengslum við sorg og sorgarferli barna og endurspeglar þær fræðilegu niðurstöður sem við komumst að í greinargerðinni. Í bókinni er sagt frá víkingastráknum, Kára, sem upplifir sorg í tengslum við lát afa síns og þær tilfinningar sem hann gengur í gegnum. Í kennsluheftinu er fjallað um þá þætti sem bókin tekur á í tengslum við sorgina og gefnar upp hugmyndir að nánari umfjöllun fyrir kennara. Greinargerðin fjallar á fræðilegan hátt um sorg og það sorgarferli sem börn geta gengið í gegnum út frá þeim heimildum sem við öfluðum okkur.