Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/4055
Ritgerð þessi fjallar um skilning manna á Austur-Asíu í gegnum tíðina en við frásögn er aðallega stuðst við reynslu Breta að nafni Ernest Satow. Satow dvaldi afar lengi í Japan á seinni hluta 19. aldar og nokkur ár í Kína snemma á þeirri 20. og er því notaður sem útgangspunktur. Í upphafi ritgerðar er stuttlega farið í gegnum sögu samskipta Vesturlandabúa við Japan og Kína og helstu kenningar vestrænna hugsuða um samfélög Austur-Asíu. Því næst er sjónarhólinum beint að Satow og sagt er frá reynslu hans og samferðamanna hans í Japan á árunum 1862-1864 og greint er frá þeim atburðum sem leiddu til Meiji endurreisnarinnar og iðnvæðingar Japans. Eftir það er sjónum beint stuttlega að því hvernig skilningur manna á Asíuþjóðunum breyttist á seinni hluta 19. aldar og fjallað um hugtök á borð við „gulu hættuna“ og félagslegan Darwinisma. Satow starfaði sem diplómati í Kína á árunum 1900-1906 svo tekin verða fyrir helstu mál sem á dagskrá hans voru þau ár og þar ber helst að nefna boxarauppreisnina, innrás Breta inní Tíbet og stríð Japana og Rússa. Í lokin verður rætt um skilning Satows á löndunum og sá skilningur vestrænna manna sem rætt hefur verið um tengdur nútímanum. Þar verður m.a. rætt um algengar skoðanir Vesturlandabúa á Kína og Kínverjum auk þess sem gerð verður grein fyrir gangrýni Kishore Mahbubani á samskipti vesturlanda og hins svokallaða þriðja heims auk þess sem Vestræn heimsmynd verður rædd lítillega út frá kenningum breska stjórnmálaheimspekingsins John Gray.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
Hrannar_Baldvinsson_fixed.pdf | 985.76 kB | Opinn | Meginmál | Skoða/Opna |