Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/4569
Í þessu meistaraprófsverkefni er leitast við að greina hvaða þættir við
innleiðingu og framkvæmd lögbundins sjálfsmats hafa helst áhrif á
viðhorf starfsmanna í fjórum skólum til gagnsemi slíks mats við að bæta
skólastarf og nýta það til skólaþróunar. Verkefnið er 50 ECTS einingar.
Kveikjan að rannsókninni var ekki síst sú að viðhorf skólamanna til
lögbundins sjálfsmats virtist vera allt frá því að það væri fyrst og fremst
íþyngjandi, gagnslítil skriffinnska til þess að vera gagnlegt og það nýtt á
markvissan hátt sem verkfæri við skólaþróun. Viðhorfin virtust heldur
ekki endurspegla hversu langt sjálfsmatið væri komið í skólunum
samkvæmt úttektum hins opinbera. Það hafði ekki verið rannsakað
sérstaklega hér á landi hvort samband væri milli þess hversu vel á veg
innleiðingin væri komin og viðhorfa til gagnsemi sjálfsmatsins.
Rannsóknaraðferðin er eigindleg og framsetning niðurstaðna nokkuð
nýstárleg. Dregin er upp mynd af skólunum og megininntak viðtala birt í
frásagnarstíl. Í framhaldi af því eru greind meginþemu sem virtust vera
líklegir áhrifavaldar við mótun viðhorfa til sjálfsmats í hverjum skóla
fyrir sig. Mikilvægi rannsóknarinnar felst einkum í því að niðurstöðurnar
geti orðið vegvísir við innleiðingu mats á skólastarfi þannig að það verði
litið jákvæðum augum og gagnist til skólaþróunar.
Helstu niðurstöður eru þær að í skólunum þar sem neikvætt viðhorf
var til sjálfsmats var enginn leiðtogi á því sviði og engin hvatning. Í
öðrum skólanum hafði skólasamfélagið með skólastjóra í broddi
fylkingar sameinast í eindregnu neikvæðu viðhorfi til sjálfsmats. Í báðum
neikvæðu skólunum var sjálfsmatið unnið í einangrun, án þátttöku
starfsmanna, af einum aðila að því er virtist fyrst og fremst af ytri kvöð til
að uppfylla lög. Í skólunum þar sem viðhorfið var jákvætt og álitið
gagnlegt til skólaþróunar voru ákveðin atriði sameiginleg. Þar var sterk
forysta í sjálfsmatsferlinu, mikil hvatning og skólastjórinn var leiðtogi í
sjálfsmati skólans. Sjálfsmatið var þátttökumiðað og kveikjan að því
sprottin úr skólasamfélaginu. Það var innleitt í litlum skrefum án þess að
íþyngja starfsfólki. Við innleiðingu sjálfsmatsins hafði skólastjórinn
forðast að leggja áherslu á ytri kvaðir og reynt að skapa þörf og áhuga
meðal starfsmanna þannig að framkvæmdin yrði af innri hvöt. Það hafði
tekist að tekist að innlima í skólamenninguna jákvætt viðhorf til
sjálfsmats, það var sameign skólasamfélagsins og samstaða ríkti um
6
mikilvægi þess. Ekki er hægt að fullyrða neitt um orsakasamband milli
þessara sameiginlegu atriða og viðhorfa starfsmanna. Þó er ekki
ósennilegt að sum þessara atriða skipti máli og vert sé að huga að þeim ef
markmiðið er að innleiða sjálfsmat þannig að starfsmenn verði jákvæðir
og fúsir að nýta það til skólaþróunar.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
Sjálfsmat og nýting þess við skólaþróun-Valdimar-Meistaraverkefni.pdf | 638.52 kB | Opinn | Heildartexti | Skoða/Opna |