Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/4885
Markmið þessarar rannsóknar var að varpa ljósi á gildi náms-og starfsráðgjafar í afplánun. Í rannsókninni voru notaðar eigindlegar rannsóknaraðferðir og gagna aflað með viðtölum og þátttökuathugun. Í ljósi þess hve lítil reynsla er af starfi náms-og starfsráðgjafa í afplánun á Íslandi voru tekin viðtöl við fagfólk með það að leiðarljósi að fá að heyra um reynslu og upplifanir þeirra sem starfa að námi fanga. Til samanburðar var tekið viðtal við fanga sem hefur nýtt sér þjónustu náms-og starfsráðgjafa í afplánun. Í niðurstöðum rannsóknarinnar kemur fram að mikilvægt er að tíminn í afplánun sé nýttur til að styrkja stöðu einstaklings með það að markmiði að auka hæfni hans til að takast á við lífið að lokinni afplánun. Framboð á námi í afplánun virðist ekki alltaf vera í samræmi við þörf og takmarkar það möguleika til náms. Lítill netaðgangur og fjárskortur hefur einnig takmarkandi áhrif á nám. Mikilvægt er að einstaklingur í afplánun hafi aðgang að ráðgjöf og upplýsingum varðandi nám og störf. Þegar nám er valið að vel ígrunduðu máli og nemandi fær nauðsynlegan stuðning og hvatningu eru meiri líkur á að því ljúki með fullnægjandi árangri.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
María - ritgerð.pdf | 980.19 kB | Opinn | Heildartexti | Skoða/Opna |