Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/607
Viðfangsefni ritgerðarinnar er að varpa ljósi á mikilvægi foreldrasamstarfs og þær
leiðir sem hægt er að fara til þess að bæta samstarfið. Tilgangurinn með
viðfangsefninu er að fá bæði foreldra og kennara til þess að gera sér grein fyrir
mikilvægi góðrar samvinnu, því hún er lykillinn að farsælli skólagöngu barnanna.
Í upphafi ritgerðarinnar er fjallað um skólahald eins og það var hér á landi á 19.
öld og rekjum við þróun þess til dagsins í dag. Miklar breytingar hafa orðið á
skólastarfinu og ekki síst á samstarfi milli heimila og skóla. Einnig er fjallað um það
sem talið er í Aðalnámskrá grunnskóla, vera hlutverk kennara og foreldra í því að búa
nemendur undir líf og starf í okkar lýðræðislega þjóðfélagi.
Því næst kemur kafli sem fjallar um foreldrasamstarf frá ýmsum sjónarhornum, til
þess að opna augu foreldra og kennara fyrir ávinningnum af slíku starfi. En til þess að
ávinningurinn verði sem mestur, verður að ríkja gagnkvæmt traust, virðing og
trúnaður á milli heimila og skóla. En hafa skal hugfast að ýmsar hindranir geta komið
upp í samstarfinu og því er mikilvægt að skólar séu með góð úrræði fyrir foreldra og
kennara. Einnig er komið inn á þann þátt sem talinn er vega hvað þyngst í samstarfinu
en það er heimanám nemenda. Í lok kaflans er foreldrasamstarfið skoðað út frá
kenningum Joyce Epstein, en hún telur að jafn mikilvægt sé fyrir skólasamfélagið að
vera í nánu sambandi við foreldra og nemendur. Þá lætur árangur samstarfsins
venjulega ekki á sér standa.
Að lokum er komið inn á leiðir til þess að auka samskipti heimila og skóla, þær
leiðir sem við gerum skil eru foreldrasamningur, Mentor og PMT-foreldrafærni.
Það er okkar álit, að með góðu og virku foreldrasamstarfi verði skólastarfið
árangursríkara og auðveldara verði að komast hjá ýmsum vandamálum sem upp
kunna að koma í skólasamfélaginu. En mikilvægt er að gagnkvæm virðing, traust og
trúnaður ríki milli heimila og skóla því það er undirstaðan að góðri samvinnu.
Ávinningurinn af slíku starfi er aukinn námsárangur og betri líðan nemenda.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
Hulda - Magna.pdf | 377.66 kB | Takmarkaður | Foreldrasamstarf : til mikils að vinna - heild |