Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/6933
Í rannsókn minni, sem er starfendarannsókn, reyni ég að skilgreina tilfinningu sem fór að láta á sér kræla á seinni árum í starfi mínu sem grunnskólakennari. Sú tilfinning lýsti sér í því að mér fannst sem máttur kennara væri að minnka og þeir væru að breytast í undirokaða og síkvartandi stétt. En mig dreymdi um að stéttin væri full af faglegum eldmóði og ástríðu. Ég vonast til að með því að rannsaka á hverju þessi tilfinning mín byggist geti ég lagt mitt af mörkum til að efla mátt stéttar minnar. Ég hóf því jafnframt leit að verkfærum sem myndu henta til að stuðla að valdeflingu kennara.
Þegar skynjanir vorar, hugsanir og hugsjónir hræra strengi tilfinninganna þá fyrst kemst rót á oss, þá losnar viljinn úr læðingi og knýr oss til athafna.
(Guðmundur Finnbogason, 1994: 30).
Til að skilgreina þessa tilfinningu mína og löngun til athafna leitaði ég í smiðju fræðimanna. Ég máta umfjöllunarefni þeirra við eigin reynsluheim og dagbókarskrif mín um stöðu kennara. Ég nýti jöfnum höndum eigin reynsluþekkingu og þekkingu fræðimanna til að draga upp þá mynd sem birtist í rannsókn minni.
Það sem birtist mér í gögnunum kemur fram sem sagan af Birtu. Saga hennar bregður upp því sem við mér blasti varðandi stöðu kennara eftir að hafa markvisst skoðað fræði og eigin reynslubanka.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
MeistaraverkefniMVSeddakjartansdottir.pdf | 1.19 MB | Opinn | Heildartexti | Skoða/Opna |