Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/7235
Líftækni (biotechnology) varð til sem iðnaður á seinni hluta tuttugustu aldarinnar og er óvenjuleg að því leyti að hún þróaðist sem iðnaður innan háskólasamfélagsins og akademískir vísindamenn tóku virkan þátt í uppbyggingu líftæknifyrirtækja. Fræðilegur bakgrunnur rannsóknarinnar byggir á kenningum um skoðanakerfi (institutional logics) sem eru grein innan nýju stofnanakenninganna (new institutional theory). Með líftækni er háskólasamfélagið og einkageirinn, áður aðskildar stofnanir, talin hafa færst nær hvort öðru og skoðanakerfi þeirra blandast. Mögulegur starfsframi vísindamanna í líftæknifyrirtækjum er talinn vera lögmætt val án þess að hefðbundinn starfsframi í akademíu sé þar með ólögmætur. Rannsóknin fór fram með eigindlegum viðtölum og leitast var við að svara hvernig íslenskir vísindamenn finna lögmæti í störfum innan líftæknifyrirtækja og hvaða réttlætingar þeir nota. Niðurstöðurnar benda til að vegna mótsagna milli markmiða vísinda og viðskipta í líftæknifyrirtækjum finni vísindamenn þörf fyrir að réttlæta starfsval sitt. Niðurstöðurnar benda einnig til minni samleitni milli akademíu og einkageira hér á landi en annars staðar.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
Bjargey_Anna_Gudbrandsdottir_2011.pdf | 511.4 kB | Opinn | Heildartexti | Skoða/Opna |