Matarpakki hlauparans: Viðskiptaáætlun

Abstract

Með mikilli vakningu Íslendinga á almennri heilsu undanfarin ár stunda margir Íslendingar reglulega íþróttir eða líkamsrækt. Ein tegund líkamsræktar sem hefur orðið vinsælli með hverju ári er hlaup. Í kjölfarið hafa sprottið upp margir hlaupa- og skokkhópar á Reykjavíkursvæðinu. Fjöldi Íslendinga sem hlaupa reglulega er því sífellt að aukast og verður meiri eftirspurn eftir vörum tengdum hlaupum. Hlauparar huga almennt að mataræði sínu eins og annað íþróttafólk og hafa rannsóknir sýnt fram á tengsl næringar og árangurs í íþróttum. Er viðfangsefni þessarar ritgerðar að útbúa viðskiptaáætlun fyrir matarpakka og máltíð sem væru sérhönnuð fyrir hlaupara. Þessi matarpakki og máltíð yrðu samsett af næringarfræðingi í samvinnu við veitinga- og kaffihúsið Happ. Viðskiptahugmyndin snýst um að hjálpa hlaupurum að huga að næringu sinni til þess að ná betri árangri í hlaupum bæði líkamlega og andlega. Með gerð viðskiptaáætlunar er viðskiptahugmyndin skoðuð og lagt mat á hvort hún sé vænleg til árangurs. Í fyrsta hluta viðskiptaáætlunarinnar er fjallað um hlaupamenningu á Íslandi og áhrif næringar á íþróttafólk. Því næst er gerð ítarleg greining á markaðsumhverfi fyrirtækisins Happs. Samkeppnisumhverfið er greint með hjálp samkeppniskraftalíkani Porters og er einnig gerð greining á innra og ytra umhverfi fyrirtækisins Happs. Þá verða skoðuð helstu tækifæri á markaðnum ásamt helstu ógnunum sem ber að varast. Til þess að fá betri innsýn í markhópinn og hvort möguleg eftirspurn væri eftir matarpakka eða máltíð fyrir hlaupara var gerð stutt markaðskönnun. Þá er sett upp tillaga að markaðssetningu Hlaupapakkans og Hlaupamáltíðarinnar með aðgerðaráætlun ásamt kostnaðar- og söluáætlun.Eftir greiningu á markaðsumhverfinu er ljóst að það er mikil samkeppni á markaðnum. Aukin vakning Íslendinga fyrir hollu og góðu mataræði ásamt hreyfingu hefur aukið framboð fyrirtækja á hollum, tilbúnum mat. Sala á Hlaupapakkanum og Hlaupamáltíðinni gæti aukið fjölbreytni og styrkleika Happs enn frekar. Telur höfundur að góður grundvöllur sé fyrir viðskiptahugmyndinni og fleiri tækifæri séu á markaðnum en ógnanir.