is Íslenska en English

Lokaverkefni (Meistara)

Háskóli Íslands > Heilbrigðisvísindasvið > Meistaraprófsritgerðir - Heilbrigðisvísindasvið >

Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/11206

Titill: 
  • Samanburður á lyfjaávísunum við útskrift aldraðra einstaklinga af sjúkrahúsi yfir á hjúkrunar- og dvalarheimili
Námsstig: 
  • Meistara
Útdráttur: 
  • Aldraðir einstaklingar sem dveljast á hjúkrunar- og dvalarheimilum eru oft veikari og á fleiri lyfjum en jafnaldrar þeirra sem búa heima, og eru því sérstaklega viðkvæmir fyrir óæskilegum áhrifum lyfja. Á Íslandi eru lyf íbúa á hjúkrunar- og dvalarheimilum yfirleitt vélskömmtuð af lyfjaskömmtunarfyrirtækjum. Þegar einstaklingur útskrifast af sjúkrahúsi yfir á hjúkrunar- og dvalarheimili þurfa lyfjaupplýsingar að berast á milli þriggja aðila: sjúkrahúss, hjúkrunar- og dvalarheimilis og lyfjaskömmtunarfyrirtækis, en við hvern flutning er hætta á að lyfjafyrirmæli misfarist. Markmið rannsóknarinnar var að athuga samræmi lyfjaávísana við útskrift aldraðra einstaklinga af sjúkrahúsi yfir á hjúkrunar- og dvalarheimili.
    Bornar voru saman lyfjaávísanir einstaklinga 65 ára og eldri, annars vegar við útskrift af Landspítala og hinsvegar á skömmtunarkortum eftir innlögn á hjúkrunar- og dvalarheimili á árinu 2011. Borin voru kennsl á misræmi í ávísun fastra lyfja.
    Við útskrift var ávísað að meðaltali 9,1 lyfjum. Hlutfall tilfella með eitt eða fleiri lyfjamisræmi var 68,2% og meðalfjöldi lyfjamisræma var 1,9 lyf. Hvorki aldur né kyn hafði marktæk áhrif á meðalfjölda lyfjamisræma. Algengustu lyfjamisræmin voru úrfellingar (e. omission). Lyfjaávísanir af ATC-flokkum N (tauga- og geðlyf), A (meltingarfæra- og efnaskiptalyf) og C (hjarta- og æðasjúkdómalyf) höfðu flest lyfjamisræmi. Þau virku efni sem höfðu oftast lyfjamisræmi voru parasetamól, omeprazól, fjölvítamín, zópíklón og parasetamól/kódein blöndur. Tilfelli sem útskrifuðust af öldrunarlækninga-deildum höfðu marktækt færri lyfjamisræmi en þau sem útskrifuðust af öðrum deildum lyflækningasviðs (p<0,001). Allt að tvöfaldur munur var á hlutfalli lyfjamisræma milli hjúkrunar- og dvalarheimila. Áhættumat á úrtaki lyfjamisræma sýndi að um 23% lyfjamisræma gætu valdið mikilli áhættu fyrir sjúklinga.
    Niðurstöður benda til þess að lyfjamisræmi séu algeng við flutning aldraðra af sjúkrahúsi yfir á hjúkrunar- og dvalarheimili. Út frá gögnum rannsóknarinnar er þó ekki hægt að álykta hve stórt hlutfall lyfjamisræma eru vel ígrundaðar breytingar gerðar af læknum og hve stórt hlutfall eru vegna villa.

Samþykkt: 
  • 30.4.2012
URI: 
  • http://hdl.handle.net/1946/11206


Skrár
Skráarnafn Stærð AðgangurLýsingSkráartegund 
MS.Auður.Alexandersdóttir.með.viðauka.pdf46.03 MBOpinnHeildartextiPDFSkoða/Opna