Skuldsettar yfirtökur: eru skuldsettar yfirtökur hagkvæmar?

Abstract

Aðalmarkmið þessarar ritgerðar er að skoða skuldsettar yfirtökur (SSY) og sjá hvort þær séu árangursrík aðferð til þess að taka yfir fyrirtæki. Til þess að komast að niðurstöðu munu hinar ýmsu heimildir um þetta yfirtökuform verða skoðaðar. Skoðað verður ferli þessara yfirtaka vandlega, meðal annars hvaða lög geta komið í veg fyrir slíka yfirtöku, hvaða eiginleika fyrirtæki þurfa að hafa til þess að teljast hentug fyrir skuldsetta yfirtöku, hverskonar lán eru notuð til að byggja fjármögnun upp og hverskonar ávöxtun eða tapi má vænta af slíkri yfirtöku . Mörg form eru til af skuldsettum yfirtökum en meginmarkmið eru að jafnaði að auka hagnað fyrirtækisins sem tekið er yfir með því að hagræða, auka tekjur, minnka skattbyrði með skuldsetningu, minnka óþarfa kostnað, selja óþarfa framleiðslueiningar og síðan selja eða endurfjármagna fyrirtækið að einhverjum tíma liðnum með hagnaði. Oft er talið að skuldir séu einn helsti banabiti fyrirtækja en á sama tíma valda skuldir því oft að skattabyrði er lægri. Því er deilumál hvort þetta sé hentugt form af yfirtökum og hyggst ég svara því á áreiðanlegan máta í þessari ritgerð. Umfjöllun verður einnig um fræðileg atriði, eins og Modigliani-Miller líkanið og niðurstöður fræðimanna um fylgni vaxtar, skuldsetningu og q hlutfalli Tobins.