...það er ekkert sjálfgefið að þetta sé tækifæri. Eigindleg rannsókn á upplifun samkynhneigðra karla á atvinnuleysi

Abstract

Í þessari ritgerð er leitast við að greina helstu afleiðingar atvinnumissis, sem birtast í sálrænum, félagslegum, fjárhagslegum og heilsufarslegum áhrifum á þá sem verða fyrir slíku áfalli. Í umfjöllun og rannsóknum á málefninu hefur komið í ljós að nokkur kynjamunur er á því hvaða afleiðingar atvinnuleysi hefur og hafa þær niðurstöður einna helst verið settar í samhengi við kynjafræðilegar kenningar um karlmennskuhugmyndir um fyrirvinnuhlutverkið. Sú orðræða hefur þóeinkum hverfst um forréttindahóp hvítra gagnkynhneigðra millistéttarkarlmanna. Því var ráðist í eigindlega rannsókn á reynslu og upplifun samkynhneigðra karla, sem ekki falla undir hefðbundnar kyngervishugmyndir – og athugað hvort og hvernig þeirra reynsla er frábrugðin upplifun gagnkynhneigðra karlmanna. Niðurstöður viðtala við fimm samkynhneigða karlmenn voru síðan kóðaðar með það í huga að greina sameiginlegan þráð í reynslu þeirra – og niðurstöðurnar metnar út frá helstu fyrirliggjandi kenningum og rannsóknum um málefnið.