Landið þitt er ekki til: Afbygging á landi, ríki og þjóð í verkum Libiu Castro og Ólafs Ólafssonar

Abstract

Sýning Ólafs Ólafssonar og Libiu Castro, Under Deconstruction, var framlag Íslands til Feneyjartvíæringsins 2011. Þar var sjónum beint að ýmiskonar þversögnum í pólitísku samhengi ásamt því að gagnrýna hugmyndafræði nýfrjálshyggjunnar. Í verkinu fást Libia og Ólafur meðal annars við stjórnarskrá Íslands, þjóðerni og hugmyndafræði tengda við lönd og þjóðir. Í þessari ritgerð verður gagnrýni Libiu og Ólafs á þessum atriðum greind með því að rýna í hugmyndafræðina á bak við hugtökin lönd og þjóðir og áhrif hennar á borgarann. Sérstök áhersla verður á verkið Landið þitt er ekki til og það skoðað í tengslum við skrif fræðimanna um þessi efni, eins og t.d. skrif Giorgio Agamben um undantekningarástand og skrif Edward W. Said um ímynduð landamæri. Með því má sjá skýrari mynd af því hvernig verk Libiu og Ólafs vekur fólk til umhugsunar um leið og það afneitar hugmyndinni um land og þjóð. Verkið verður sett í hugmyndafræðilegt samhengi við skrif Benedict Anderson um hvernig þjóðir verða til og út frá því verður leiddar líkur að því að land okkar, sérhvers manns, er ekki til.