Skrifa nafnið sitt í leikskóla og lesa í grunnskóla : um þróun í læsi á meðal barna við lok leikskólagöngu

Abstract

Vorið 2011 lauk tveggja ára þróunarverkefni í einu af leikskólahverfum Reykjavíkur. Í lokaáfanga verkefnisins voru tekin hópviðtöl samkvæmt eigindlegri rannsóknarhefð við áttatíu og níu elstu börnin í fimm leikskólum hverfisins. Tilgangurinn var að leita eftir viðhorfum barnanna til leikskólaáranna og kanna væntingar þeirra til þess að byrja í grunnskóla. Eitt af því sem fram kom í viðtölunum voru vísbendingar í þá veru að mörg barnanna væru komin á veg að þróa með sér læsi. Þessi grein beinist að þeim niðurstöðum þróunarverkefnisins. Börnin þekkja hlutverk ritmáls, kunna marga bókstafi og sum geta lesið orð og lengri texta. Í hugum barnanna er skýr munur á því hvort þau leika sér með stafi eða læra þá. Þau leika sér í leikskólanum og æfa sig þar en læra bókstafina heima. Börnin eru þess fullviss að í grunnskólanum læri þau að lesa og skrifa. Börnin kunna að skrifa nafnið sitt sjálf og það hafa þau lært heima og í leikskólanum.