Áhrif íþróttaiðkunar á hreyfiþroska barna

Abstract

Í þessari ritgerð er reynt að leita svara við þeirri spurningu hvort að skipulögð íþróttaiðkun hafi áhrif á hreyfifærni barna. Í fræðilegri umfjöllun er hugtakið hreyfiþroski skilgreint og þeir þættir sem geta haft áhrif á hreyfifærni barna skoðaðir. Einnig er farið í mikilvægi hreyfingar fyrir börn og hvaða áhrif hreyfing hefur á líf barnanna. Rannsóknin sem gerð var fólst í því að skoða hvort skipulögð íþróttaiðkun barna fyrir sex ára aldur eða iðkun þeirra nú hafi áhrif á hreyfifærni þeirra. Rannsóknin var framkvæmd á nemendum 1. bekkjar í Njarðvíkurskóla, þar sem rannsakandi fór í samstarf með íþróttakennara þeirra og fékk að nota niðurstöður hreyfiþroskaprófs nemenda hans í þessari rannsókn. Þátttakendurnir sem tóku þátt voru 36. Spurningalisti var sendur á netinu til foreldra barnanna og þeir beðnir um að svara spurningum um íþróttaiðkun barna þeirra. Hreyfiþroskaprófið ABC var fengið að láni hjá HR og það notað. Prófið var framkvæmt í íþróttamiðstöð Njarðvíkur þann 13 mars 2012. Helstu niðurstöður voru þær að í báðum tilvikum reyndist munurinn ekki marktækur og íþróttaiðkunin virtist því ekki hafa áhrif á hreyfifærnina. Meiri munur reyndist vera innbyrðis á milli stelpna en stráka. Þá virðist fjöldi æfinga í viku auka hreyfifærni barna, þó munurinn reynist ekki marktækur.