en English is Íslenska

Thesis University of Akureyri > Hug- og félagsvísindasvið > Meistaraprófsritgerðir >

Please use this identifier to cite or link to this item: http://hdl.handle.net/1946/1249

Title: 
  • is The role of art and art making in adolescents’ everyday life : a case study
Abstract: 
  • is

    Myndsköpun er áhrifarík leið fyrir ungt fólk til sjálfsþekkingar þar sem hún veitir
    tækifæri til að koma skipulagi á og gera áþreifanlega eigin reynslu og upplifanir.
    Þessu verki er ætlað að varpa ljósi á hlutverk sjónlista og myndsköpunar í
    daglegu lífi ungra námsmanna, jafnframt því að skoða hvernig frásögn þeirra af eigin
    myndverkum kann að hafa áhrif á mótun sjálfsmyndar.
    Tveir hópar unglinga á aldrinum þrettán til sautján ára tóku þátt í þessari
    rannsókn. Annars vegar sex stúlkur og fjórir piltar sem hljóta kennslu í myndlist í
    sínum grunnskóla, hins vegar fimm stúlkur og fimm piltar sem hafa valið að sækja
    aukalega nám í myndlist á sérstökum námskeiðum fyrir börn og unglinga (í
    Myndlistaskólanum á Akureyri). Opin einstaklingsviðtöl við nemendur fóru fram í
    janúar 2002. Nemendur voru beðnir að koma með eigin myndverk í viðtalið, eitt eða
    fleiri, sem höfðu sérstaka þýðingu í huga þeirra og var seinni hluti hvers viðtals
    byggður á frásögn þeirra af þessum verkum.
    Megin niðurstöður rannsóknarinnar leiða í ljós að myndsköpun er gefandi í
    daglegu lífi ungmennanna á margan hátt og kjarna merkingar hennar er að finna í hinu
    listræna sköpunarferli. Nemendur leggja áherslu á gildi innri ánægju listsköpunar sem
    er ekki einungis að finna í sköpunarferlinu og / eða sköpunarverkinu heldur er þeim
    jafnframt hvatning til frekari dáða. Þekking á ‘viðurkenndu’ tungumáli
    myndlistarinnar opnar leiðir til sjálfsmats sem á móti virkar örvandi og leiðir af sér
    nýjar markmiðsetningar. Allt eru þetta mikilvægir þættir í listsköpun sem og í mótun
    sjálfsins. Nemendur eru einnig meðvitaðir um samskiptamöguleika þá sem verk þeirra
    bjóða uppá til dæmis á túlkun eigin tilfinninga og hugmynda eða að koma skilaboðum
    áleiðis í mynd.
    Frásagnir nemenda af eigin myndverkum opnuðu flóðgáttir útskýringa á
    daglegu lífi þeirra og skýringar þeirra styðja þá skoðun að frásagnarsjálf (narrative
    identity) sé í raun að skapa eigin lífssögu gegnum munnlega frásögn.
    Sá kynjamunur sem könnunin sýnir tengist hefðbundnum kynímyndum
    “umhyggjusamra” stúlkna og “sjálfstæðra”(eða athafnasamra) drengja. Stúlkur sýna
    þó einnig sterka sjálfsmynd og þær túlka mun oftar tilfinningar í myndum sínum en
    drengir. En mun á nemendum eftir skólum má finna þegar kemur að sjálfsmynd
    þeirra. Nemendur myndlistaskólans tengja örugga og jákvæða sjálfsmynd sína beint
    við listathafnir sínar og hafa tamið sér opin huga og sjálfstæð vinnubrögð. Þeir létu
    einnig í ljós mikilvægi samskipta við aðra nemendur með sama áhugamál, að
    samsama sig hópnum í svokölluðum smáeiningu (micro culture).
    Í inngangi þessa verks er sett fram sú fullyrðing að hlutverk listsköpunar í
    daglegu lífi ungmenna skiptir máli. Þetta verk sýnir fram á að svo er. Rétt eins og
    listaverk ber í sér margar merkingar leggja unglingarnir ólíkar en mikilvægar
    þýðingar í list sína og listathafnir. Fyrst og fremst er um að ræða eigindleg eða innri
    gæði sem leiða til skilnings á sjálfum sér og veröldinni.

Accepted: 
  • Jan 1, 2001
URI: 
  • http://hdl.handle.net/1946/1249


Files in This Item:
Filename Size VisibilityDescriptionFormat 
Rósa Kristín Júlíusdóttir_heild.pdf7.14 MBOpenRole of art - heildPDFView/Open