Lærum eðlisfræði á gagnvirkan hátt : um notkun gagnvirkra sýndartilrauna í eðlisfræðikennslu

Abstract

Lokaverkefni mitt er vefsíða með kennsluleiðbeiningum og upplýsingum um nokkrar gagnvirkar sýndartilraunir í eðlisfræði sem hannaðar hafa verið við University of Colorado og aðgengilegar eru á vefslóðinni http://phet.colorado.edu/. Ég skoðaði þær frá grunni og skráði helstu notkunarmöguleika þeirra, ásamt því að koma með hugmyndir að notkun þeirra við kennslu í eðlisfræði á unglingastigi grunnskóla. Vefsíðan fékk nafnið Lærum eðlisfræði á gagnvirkan hátt og er að finna á vefslóðinni: http://edlisfraedikennsla.wordpress.com/.Við vinnslu kennsluleiðbeininganna voru markmið nýrrar aðalnámskrár grunnskóla, almennur hluti (2011) og aðalnámskrár grunnskóla í náttúrufræði og umhverfismennt (2007) höfð að leiðarljósi, ásamt drögum að nýju námsefni sem verið var að útbúa til eðlisfræðikennslu á unglingastigi. Þó svo að miðað hafi verið að mestu leyti við ný drög að ákveðnu námsefni við gerð leiðbeininganna er ekkert því til fyrirstöðu að gagnvirku sýndartilraunirnar séu nýttar með öðru eðlisfræðitengdu námsefni ef þær taka á því efni sem verið er að kenna hverju sinni. Gagnvirku sýndartilraunirnar eru að mínu mati kærkomin viðbót í eðlisfræðikennslu hér á landi þar sem þær opna í raun nýja vídd í kennslu sem nemendur og kennarar hafa aldrei áður átt kost á að nýta sér. Þær eru nokkurskonar sambland af myndrænum upplýsingum og framkvæmd tilrauna í sýndartilraunastofu þar sem nemendur geta nú framkvæmt tilraunir í tölvu og séð um leið myndræna framsetningu á kröftum, sameindum og ýmsu öðru sem ekki verður skynjað í venjulegum tilraunum, ásamt því að sjá um leið tölulegar upplýsingar.