Er samkynhneigð í boði fyrir fólk með þroskahömlun? : greinargerð

Abstract

Þessari greinargerð er fylgt úr hlaði með fræðslubækling sem gerður er fyrir samkynhneigt fólk með þroskahömlun. Vöntun er á slíku efni þar sem oft er gert ráð fyrir að fólk með þroskahömlun sé kynlaust og eilíf börn. Gagnkynhneigð er einungis í boði ef viðurkennt er að kynferðislegar tilfinningar séu til staðar. Samkynhneigðu fólki með þroskahömlun er því gert mjög erfitt fyrir við til dæmis að leita sér stuðnings og fá kynhneigð sína viðurkennda. Oft eru það fjölskyldur, vinir og fagaðilar sem standa í vegi fyrir að fólk með þroskahömlun geti þróað kynferði sitt og átt í innilegum samböndum. Eflaust er það vegna hræðslu á að það verði misnotað, viti ekki hvað er viðeigandi og hafi ekki burði til að verja sig. Til að sporna gegn því að fólk með þroskahömlun njóti ekki sjálfsagðs réttar til að vera kynverur þarf að auka fræðslu fyrir fagfólk og fjölskyldur þeirra. Fagfólk þarf að geta brugðist rétt við og stutt kynhegðun viðkomandi einstaklings en ekki komið í veg fyrir hana líkt og algengt er. Tillaga að úrbótum, auk meðfylgjandi bæklings, er að útbúin verði handbók fyrir fagfólk sem einnig gæti gagnast fjölskyldum fólks með þroskahömlun. Markmiðið væri að veita upplýsingar til að gera fagfólk og aðstandendur betur í stakk búið til að veita stuðning og hjálp við að stuðla að jákvæðri kynhegðun og persónulegum samböndum fólks með þroskahömlun.