Aðför vegna umgengistálmana

Abstract

Við setningu gildandi barnalaga nr. 76/2003 var í fyrsta sinn á Íslandi lögfest heimild til að koma á umgengni með aðför. Fram til þess var álagning dagsekta eina úrræðið til að knýja á um efndir á umgengni. Í nóvember 2011 lagði innanríkisráðherra fram frumvarp til breytinga á barnalögum þar sem m.a. var lagt til að fella brott heimild til aðfarar. Vísað var til þess að ýmsir fagaðilar hefðu lýst áhyggjum af framkvæmd þessara mála hér á landi, þ.e. því að það gæti verið barni fyrir bestu að taka það með valdi úr umráðum annars foreldris síns í því skyni að koma á umgengni við hitt foreldið. Alþingi samþykkti breytingartillögur velferðarnefndar um að heimildin skyldi vera til staðar í lögum.Lög til breytinga á barnalögum voru samþykkt í heild sinni 12. júní 2012 og munu taka gildi 1. janúar 2013. Í þessari grein verður fjallað nánar um heimild til að koma á umgengni með aðför, sjónum beint að rökum með og á móti úrræðinu og skoðuð reynsla af beitingu þess.