Safnastarf, elíta og samfélag: Hlutverk og ímynd safna

Abstract

Í þessari ritgerð er fjallað um hlutverk safna í íslensku samfélagi dagsins í dag og hvaða skoðanir almenningur hefur á safnastarfi og ímynd safna. Fjallað er um söfn út frá tengslum menningar og valds og hvernig almenningur upplifir kenni- og túlkunarvald safna. Einnig er fjallað um skoðanir almennings á þeim hópum samfélagsins sem hafa í gegnum tíðina tengst hugmyndum um hámenningu og söfn. Stuðst er við rannsóknir á tengslum valds, menntunar og samfélagsstöðu og hvernig mismunandi hópar samfélagsins upplifa söfn og safnastarf í því tilliti. Fyrst er fjallað um þær kenningar og hugtök sem ritgerðin byggir á og farið er yfir breytingar á áherslum safna varðandi hlutverk sitt gagnvart almenningi frá því á 18. og 19. öld. Einnig eru lagðar til grundvallar rannsókninni laga- og reglugerðir auk menningarstefna sveitar- og bæjarfélaga um safna- og menningarmál. Upplifun og skoðanir einstaklinga af ólíkum sviðum samfélagsins eru þar á eftir skoðaðar í samhengi við áherslur yfirvalda og safna. Markmið þessarar ritgerðar er að varpa ljósi á áherslur almennings og skoða hvort samhljómur er á milli viðmælenda, yfirvalda og safna hvað varðar hlutverk og ímynd safna í íslensku samfélagi.