Áhrif auglýsinga á efnishyggju

Abstract

Í þessari rannsókn er markmiðið að athuga hvort að hægt sé að kalla fram efnishyggju með því að láta fólk horfa á auglýsingar. Þeir sem eru efnishyggnir leggja áherslu á veraldleg gæði á kostnað andlegra. Þátttakendum var skipt í tvo hópa, tilraunahóp (N = 40) og samanburðahóp (N = 39). Tilraunahópurinn sá myndband með auglýsingum sem innihéldu dýrar vörur ásamt fallegu og frægu fólki en samanburðahópurinn sá myndband um náttúru Íslands og tónlistarmyndband. Eftir að búið var að horfa á myndbandið var efnishyggja mæld með tveimur listum. Tilgátan er sú að tilraunahópur mælist með hærri efnishyggju en samanburðahópur eftir að hafa horft á auglýsingar. Tilgátan var hrakin þar sem ekki var marktækur munur milli hópanna. Niðurstaðan bendir til þess að ekki séu tengsl á milli auglýsinga og efnishyggju. Hana má meðal annars skýra með því að ef efnishyggja er skilgreind sem gildi er erfitt að hafa áhrif á hana með stuttu inngripi, þar sem gildi breytist hægt eða lítið í gegnum lífsleiðina.